Valpuia'n semifinal-ah Mumbai hruai thleng

Pathianni zan Indian Super Cup inkhel pawimawhah Hmingthanmawia (Valpuia) chuan Mumbai City tan goal a khung a, Chennaiyin lakah a team hi 1-0 a hnehna chanpuiin semifinal an lut.

Kalinga Stadium-a inkhelah, a chak zawk chu semifinal lut tur an ni a, Valpuia goal hmangin Mumbai an chak. Semifinal-ah nizana FC Goa leh Odisha inkhela chak zawk an hmachhawn ang. He thu buatsaih a nih lai hian result kan hre hman lo.

Nimin inkhelah Inter Kashi tan Edmund Lalrindika'n goal a khung ve bawk a, I League club hi Bengaluru FC nen 1-1 in an inhnehtawk - team pahnih tan beisei tur a awm tawh chuang lo a, hei hi an tawpna a ni.

Edmund-a'n a club hlui Bengaluru laka goal a khung hnuah Bangalore club tan Javi Hernández chuan khung ve lehin, si phurh a sut a, hun tawp thlenga goal dang lut loin team pahnih hi an ṭin - Inter Kashi tan Lalruatthara chu bench aṭangin a lut a, Bengaluru lamah F. Lalremtluanga chu half time ṭantirah luhtir a ni bawk.

Super Cup-ah hian team 16 inelin, team pali zel awmin, group paliah ṭhen an ni a, group tina a sang ber ṭheuhin semifinal hi an lut a ni.