Kane leh nomawi - hrang tura duan?

Nomawi lian tham la chawi lo Harry Kane-a'n nomawi chawi ngei ngeina tur club Bayern Munich a pan a, thla ruk a liam meuh chuan Bavarians hi nomawi chawi lo thei dinhmunah an ding.

Bundesliga-ah nomawi inchuh boruak a hot chho ṭan hle. Hmahruai mektu Bayer Leverkusen-in an elpui RB Leizpig chu khualmualah injury time-a goal an khung hmangin an hneh hram a, an chak miau avangin an hlawhchhuah chu point thum a ni. Bayern erawhin Pathianni zanah Werder Bremen an mikhual a, VAR hmanga mikhual team goal khat thai bo sak an ni nachungin Allianz Arena-ah 1-0 in an chak lo.

Thomas Tuchel-a hoten point 41 an hmu mek a, point sarihin hmahruaitu Xabi Alonso hote an pha lo. Bayern hi DFL Supercup-ah a chak lo zawkah an ṭang a, DFB Pokal-ah an tla tawh a, UCL-ah la dam mah se champion har zia chu tlang hriat a ni a; bel chhung sa anga ngaih ṭhin Bundesliga nomawi pawh a chiang ta lo.

Mangchhia chu

Bayern-in an player neih ṭhat an luhtir a, Bremen lakah point thum hmuh ngei an tum. Bavarians hian rin lawk ang ngeiin ball pawh an chang tam a, mahse chance ṭha bik an insiam thei lo. Box pawn aṭanga Leroy Sane pet over chu first half-a an chance neih ṭhat ber a tih theih.

Bremen lamah Bayern tan pawha khel tawh Mitchell Weiser a hmuhnawm a, Real Madrid nena sawizawm Alphonso Davies tan buaina tham a tling. Weiser ball pet ṭha chu Davies-a'n a tlawh kawi a, Manuel Neuer zarah Bayern an him hram.

First half-ah Bayern hnufual thei an ni a, Bremen-in counter attack hmangin an nawr let a, Justin Njinmah-a'n cool takin a khung. Mahse, VAR hmanga enlet hnuah Jamal Musiala ball an chhuhsak danah foul a awm avangin pawmsak an ni ta lo thung.

Bayern tlarhma an che ṭha tawk lo a, minute 50-naah Harry Kane-a'n chance hmasa ber a nei chauh - England captain hian goal zawnah a pet lo. First half-a Kane-a'n chance a nei miah loh hian Bayern khelh chhiatzia a pholang.

Kum 29 mi Weiser bawk a rawn langsar a, minute 59-naah mual dinglamah Davies bumin angle zim tak aṭangin kawh pawtin a pet lut. Goal an chhuah hnuah Bayern player-te ben harhin an awm chauh.

Hun tawp lamah Bayern-in an chance insiam hnem a, Kane-a'n corner kick aṭanga ball kal a hmang ṭangkai thei lo. Sane a hlauhawm chhunzawm a, mahse keeper Michael Zetterer-a'n a hna a ti ve tlat.

Substitute Mathys Tel a nung ṭha a, mahse goal hmaah a vannei bik lo. Tel-a ball tauh ṭha zet chu keeper-in a nem per hman a, hemi hnu hian ṭum hnih kawh zet zetin a pet a, goal pawnah ve ve a kal. Bayern 2-0 in an chak lo a, Bremen ai mahin Leverkusen an lawm ang.

Tuchel a thinur

Bayern boss Thomas Tuchel chuan, "Kan khelh dan chu player-te zawt ru. Point 10-a hmahruaitu leh UCL khelh hmabak ang maiin kan khel. A tir aṭang nung phata khelh tum kan ni a, kan tum angin kan khel lo," tiin an chak loh chhanah player-te a mawhpuh.

Chelsea leh PSG manager hlui Tuchel-a'n player-te a mawhpuhna hi dik bawk mah se a kaihhruaina hnuaiah hian Bayern hian chetsual an nei ta fo. Harry Kane, Leroy Sane, Kingsley Coman leh Jamal Musiala te bakah bench-ah player ṭha an kawl a, Tuchel hi insawi fihlim thei a ni lo.

Bayern hian January 24, Ningani zanah Union Berlin an mikhual lehnghal dawn a, Leverkusen nena an inkar tizim turin Tuchel leh a hote hian hnehna an chan ngei a pawimawh ang.