A chung berah Juventus

Juventus chuan Lecce 3-0 a hnehin Serie A table chung berah an invawrh kai a, an manager Massimiliano Allegri chuan Italian football inelna sang berah a team enkawl vawi 300 a chak tlinpui ta chiah, mellung pawimawh a phun nghal bawk tihna a ni.

Pathianni zan Lecce khelmuala inkhelah, mikhual Juve tan striker ṭha Dusan Vlahovic chuan goal hnih a khung. Serbia international hian tun hnai a match hnuhnung panga aṭanga goal ruk khungin a ke a hmui hle.

Goal hmasa zawk atan ball kang lai a hlap lut a, a goal hnihna erawh Weston McKennie-a tauh luh ngei tur, lo khawih lo pawh ni se la lut chiang tawh tur chu a lo tlawh zeuh a, inkhelh banah McKennie hnenah ngaihdam a dil zui - an goal thumna chu Gleison Bremer khung a ni thung.

Juve an chak ang bawkin Allegri tan zan pawimawh leh chhinchhiah tlak a ni bawk. Cagliari leh Milan bakah Juve hi ṭum hnih a enkawl tawh a, Serie A-ah hian match 491 chu a naute a kaihruai tawh, vawi 300 chak tlin theih hi record ṭha a ni.

Milan tan league nomawi a lak tawh bakah Juventus hi a zawnin vawi nga a champion pui tawh bawk. Italian football inelna sang berah hian amah aia chak tam manager chu Nereo Rocco (302) leh Giovanni Trapattoni (352) te chauh an ni.

Kum 56 mi Allegri chuan, "Inkhel ṭhenkhatah chuan mahni inven a ngaih hun a awm a, ṭhenkhatah chuan na taka nawr a ngaih hun a awm ve bawk. Tunah a pawimawh lai chu kan boruak a ṭhain kan chak zel hi a ni rih.

"Player ten inrintawkna an nei sang em em a, hetiang a nih zel chuan Inter Milan kan umphak thei a, kan tlanpel thei bawk ang," tiin Serie A champion an nih theih ngei a beisei thu a sawi bawk.

Juve hian Inter Milan lakah point khatin hma an hruai, amaherawhchu Turin club hian match khatin an khel hnem zawk. Inter Milan hian nizan khan Italian Super Cup an khelh avangin league match an khel ve rih lo a ni.