Real an 'comeback' - Barca tan Torres-a hattrick

La Liga table mawngphah luahtu Almeria lakah 2-0 in hnufual hman mah se, Real Madrid-in an theihna tak tak pholangin, second half-ah an comeback a, minute 90 an khelh zawh meuh chuan Carlo Ancelotti naute hi 3-2 in an chak.

Almeria hian Largie Ramazani leh Edgar Gonzalez hmanga goal khungin, first half-ah Real hi 2-0 in an barakhaih. Mahse, chawlhlawk hman zawh a nih hnuah Real an inlar ṭan a, Jude Bellingham (penalty), Vinicius Junior leh Carvajal ten goal khat ṭheuh khungin, a tawpah point thum an hlawh.

Hetihlai hian Girona chuan 5-1 ngawta Sevilla sawpin, table chung ber an luah chhunzawm a, Real aia point khata sang zawkin, match khatin an khel tam thung - Girona tan hian Artem Dovbyk chuan hattrick a siam a, an 'puja' a fuh laklawh.

Champion tum Barcelona pawhin thai bo theih an la ni lo tih pholangin, Real Betis chu 4-2 in an hneh. Betis tan Isco chuan goal hnih khung mah se, Ferran Torres chuan Barca tan hattrick siamin, Joao Felix chuan goal khat a thawh ve bawk a, 4-2 in Barca an chak.

An chak hram

Santiago Bernabeu-ah harsatna nei loa chak turin Real beisei an ni a, mahse, goal hnih an chhuah hmasa a, comeback mah se, an chak danah sawisel tur a awm bawk - tun season-a chak la nei miah lo Almeria hian second 38-na lekah Ramazani hmangin goal hmahruai an khung a, an duhtawk mai lo.

Minute 43-naah Edgar Gonzalez chuan a khung ve leh a, Real ṭantute thawm chu reh tak a ni. Goal dang lut loa chawlhlawk hman a nih hnuah Almeria an vanduai - minute 57-naah sawisel theih takin penalty an chawi.

Fran García ball cross luh chuan Almeria centre back Kaiky Fernandes-a ban bul a per a, referee-in handball a ham - Antonio Rudiger chu a foul niin a lang a, mahse, hei erawh referee-in hmuh hmaihin Almeria hi penalty a chawitir!

Jude Bellingham chuan penalty hi goal-ah chantirin, 2-1 a ni a, Real-in beiseina thar an nei. Almeria hian Sergio Arribas hmangin an goal thumna an khung zuiah an inngai a, mahse, referee-in goal luh hmaa foul a awm vangin VAR a rawn hnuah goal-ah a pawm lo.

Van a duai

Almeria vanduai a kaltluang tiin a sawi theih - minute 67-naah Vinicius Jr chuan Aurélien Tchouaméni-a ball cross chu a darin a tauh lut a, a ban a fuh tel ngei niin lang mah se, Kaiky laka handball-a hamnaah referee-in handball-ah a ngai lo a, a tirah handball ham mah se VAR puihna nen goal-ah a pawm.

Real hian hun pek belh minute kuanaah Carvajal hmangin an khung belh a, hun tawp thlenga goal dang awm tawh loin, 3-2 in Real an chak a, Almeria erawh an lungawi lo hle. Almeria midfielder Gonzalo Melero chuan, "Min rawk a ni ber alawm - hetianga sawi hi hrehawm ka ti a, mahse, hrilhfiah dan tur dang ka hre lo," a ti!

Almeria goal hnihna khungtu Gonzalez chuan, "He inelna hi tu tan pawha fair tura kan beisei a ni a, mahse, chutianga hmuh chu a harsa ṭhin hle," a ti a, referee chu Real Madrid duhsak bikah a puh.

Real boss Ancelotti chuan, "VAR thutlukna avanga Almeria lungawi lohna hi ka hriatthiampui a, chutihrual chuan thutlukna dik tak vek niah kei chuan ka ngai a ni," a ti a, a chak lam an ni bawk a, referee thutlukna a pawm.

Hattrick pahnih

Barcelona tan Ferran Torres chuan hattrick a siam a, tun thlaa Catalan club chhuahsan tur anga sawi awm hman forward hian Barca tana a hlutzia a pholang - tun season inelna hrang hrangah match 29 khela goal 11 khungin, assist vawi li a nei tawh.

Torres hian minute 21-na leh 48-naah goal khungin, Barca hi 2-0 in hma a hruaipui. Mahse, Betis lama harhtharna chang mek Isco chuan minute 56-naah mawi zetin si phurh a sut ṭhen a, minute 59-naah a goal hnihna khung lehin, a sut zo der.

Team pahnih hi an inhnehtawk mai dawn niin a lang tawh. Mahse, Xavi-a'n substitution a siam fuh a, bench aṭanga luhtir Felix chuan minute 90-naah an goal thumna a khung a, hun pek belh minute hnihnaah Torres chuan chak nemnghehna leh a hattrick siamna a khung zui.

Barca chak hnuah Girona inlanin, Dovbyk chuan Pathianni zan La Liga-a hattrick pahnihna a siam a, Viktor Tsyhankov leh Cristhian Stuani ten goal khat ve ve khung ve bawkin, Sevilla tana Isaac Romero goal khungin awmzia a nei lo - hattrick siamtu Dovbyk hian La Liga bikah goal 14 khung tawhin, Bellingham nen La Liga top scorer an ni mek.