Morocco tan nghah rih a la ngai

Africa Cup of Nations khelh laiah Morocco chuan last 16 an la lut rih bik lo, an chak mai dawn nia a lan hnuah DR Congo nen 1-1 in an inhnehtawk a, an group match hnuhnung ber an ngaihchan a ngai dawn ta a ni.

Group F aṭangin Morocco hi tlang ngei tura ngaih an ni a, an match hmasa lama an chak avangin an buk a rit zual bawk. Mahse, DR Congo laka Achraf Hakimi goal khung chu hun tawp dawn lamah Katompa Mvumpa-a'n a sut avangin point an insem rih ta zawk.

Chelsea player hlui Hakim Ziyech awmna Morocco hian an group match hnuhnung berah Zambia an la tum dawn, point khat chauh pawh an hmuh belh thei a nih chuan last 16 an lut phak dawn tihna a ni.

Group F inkhel dangah Zambia leh Tanzania te pawh 1-1 bawkin an inhnehtawk a, an group-a team pali te hian knockout stage lut turin beiseina an la nei vek, an match tawp berah an dinhmun chinfel a ni ang.