NFL mi hang President hmasa ber Jason Wright

American football-a inelna ngaihhlut hlawh National Football League club Washington Football Team chuan Jason Wright chu President a tan an ruat a, NFL team-a mi hang President hmasa ber a ni. 

Kum 38 mi Wright hian player a nih laiin Atlanta Falcons, Cleveland Browns leh Arizona Cardinals tan a khel ṭhin a, inkhelh a chawlhsan hnuah University of Chicago Booth School of Business aṭangin kum 2013 khan Master of Business Administration (finance) a zo. 

Player a nih laia running back-a khel ṭhin Wright chuan, "Ka tan chuan hun duhawm tak a ni. Washington Football Team hi nasa takin a inthlak danglam a, football mai ni loin thil dang dangah pawh nasa takin hma a la a ni," a ti.

Washington Football Team hi Washington Redskins tia hriat an ni ṭhin a, mahse Redskins hi 'Native Americans' ho hmuhsitna lam rawng kai hming a nih avangin Washington Football Team tiin an hming hi an thlak a ni.