Training kan nei tlai - Srikanth

India badminton player ten tun kar aṭangin training pangngai an nei chauh a, world number 1 hlui Kidambi Srikanth chuan a duh aiin training pangngai an neih har thu a sawi chhuak - inelna awm thut thei reng a nih thu a sawi bawk.

March thla khan All England Championship khelh a ni, a hnu lamah erawh Covid-19 vangin badminton tournament a la awm leh lo. Badminton World Federation chuan inelna neih hun tur an la ti chiang thei lo a, kuminah erawh inkhelh theih ngei an beisei.

Srikanth chuan, "Training hi ka duh aiin kan nei har, mimal training chu nei mah ila coach leh min kaihruaitu awm ngei chunga inbuatsaihna neih hi chu a boruak a danglam. Vanneih thlak takin BWF hian tun hnaiah tournament buatsaih a tum rih lo niin ka hria.

"Amaherawhchu kan hma hun hi tumahin kan hre lawk lo, tournament hi awm thut thei a ni ve reng tho. Taksa bakah rilru a inpeih a pawimawh a, chumi tur chuan hun kan la mamawh deuh dawn," a ti.

Srikanth bakah hian PV Sindhu leh Saina Nehwal te pawhin SAI-Gopichand Academy-ah training an zawm a, kuminah Olympic awm dawn lo mah se nakkum atan inbuatsaihna an kalpui reng a ngai.