Nou Camp-a Barca ngamtu Zidane & Ronaldo

El Clasico - Khawvela inkhel ngaihven hlawh berte zinga mi chu Inrinni zan khan Nou Camp-ah khelh a ni a, Zinedine Zidane a kaihhruai Real Madrid chuan 2-1 in Barcelona an hneh.

Inkhel dangah Atletico Madrid chuan Real Betis 5-1 a an lo sawp bawk avangin La Liga nomawi inchuh boruak a nung thar.

Luis Enrique naute hian match 31 khelh tawh aṭangin point 76 an hmu a, an hnuaiah hian Atletico (70) leh Real Madrid (69) te an awm. Match sarih aṭangin point 21 hlawh chhuah theih a la nih avangin champion tur a chiang rih lo hle.

Barcelona tan Gerard Pique chuan goal hmahruai khung mah se Karim Ben-zema-a'n a sut a, defender Sergio Ramos hnawhchhuah a nih hnuah Cristiano Ronaldo chuan chakna goal a khung.

Nikum November thla khan tun season La Liga-a El Clasico hmasa zawk chu Santiago Bernabeu-ah khelh a lo ni tawh a, Rafa Benitez a hnuaiah Real Madrid hi an khelmualah 4-0 in an mualpho. Tunah erawh Zidane kaihhruaina hnuaiah Real-in khualmualah hnehna an chang let ve leh ta a ni.

Inkhel chu

Barcelona lamain a dan pang-ngain ball an chang tam a, ball possession 68% zet an nei. Team pahnih an fimkhur avangin goal a lut har a, khawvela attacking trio fuh bera ngaih Lionel Messi, Neymar leh Luis Suarez te chu Ramos a kaihhruai Pepe, Marcelo leh Daniel Carvajal ten minute 45 chhung an dang chat thei.

Second half-ah Barca chuan an corner hmuh hmang ṭangkaiin defender Pique chuan goal hma-hruai a khung a, Toni Kroos a siam-sak dawngtu Benzema chuan scissor kick ropui hmangin an si phurh a sut. French international hian tun season-a a league goal 21-na chiah a ni nge nghe.

Real captain Ramos chu minute 83-naah Suarez a tih tluk avangin hnawh-chhuah a ni a, Barcelona tan goal khung theihna hun a inhawnga ngaih a ni.

Amaherawhchu, khawvela player man to ber Gareth Bale chuan Ronaldo tan ball duhthusama ṭhaa vawrh lutin Portugal captain hian a awmin a lo dawng a, minute minute 85-naah chakna goal a hlap lut.

Barca tan a na

Inrinni zan hian March 24 a chuap cancer vanga thi ta Barca player leh manager ropui lo ni tawh Johan Cruyff sunna chu inkhelh ṭan hmain hman a ni a, Catalan player-te hian an kawrah "Gracies Johan" (Johan kan lawm e) tih ziakin fan-te pawhin heng thu inziahna hi an pholang bawk.

Mahse, an legend sunna zanah hian Barca-in goal an nawr na tawk lo a, goal zawnah vawi thum chiah an pet thei. Dutch legend tan chak duh hle mah se an hlawhtling lo. Luis Enrique naute hian nikum October thlaa Sevilla 2-1 an hneh loh hnua a vawi khat nan an chak lo ve leh ta a ni.

Ramos a mak

Barcelona leh Real Madrid inelna hrang hranga an inkhelh hnuhnung palia red card phawrh chu Real player-te hmuh vek a ni a, a pangana ni turin Ramos chuan a hmu leh bawk.

Spain international hi inkhelh ṭan tirh lampanga Sergio Busquets laka a foul vangin yellow card pek a ni a, hun tawp dawngah Suarez laka hlauhawm taka a chet vangin card pek nawn niin hnawhchhuah a ni. Ramos hian Real tan kum 11 khel tawhin El Clasico-ah vawi li ngawt hnawhchhuah a ni tawh.

Eng nge an sawi?

Barcelona manager Enrique chuan, "Real khan tlarhnungah player an remkhawm ṭhain an khawng hle. Goal khung turin kan nawr na tawk lo a, second half-ah phei chuan keini aiin an khel ṭha zawk," a ti.

Enrique chuan no-mawi chung-chang sawi chhun-zawmin, "A zawnin match 39 chhung tlawm nei loin kal tluang thei mah ila title kan lak chuang loh chuan awmzia a nei lo. Team khelṭha tluang ber chu pakhatna an nih dawn avangin inthlahdah loa ṭan mar pat a ngai," tiin a sawi.

Beiseina an la neih thu sawiin Zidane chuan, "Barca chu point sarihin kan la phak lo a, tuna kan hmabak hmasa zawk chu Atetico lehpelh phawt a ni. Inkhelh hmabak a la tam avangin thil a la danglam thei," a ti.

French manager chuan sawi chhun-zawmin, "Inkhelh zawng zawnga hnehna chan a pawimawh a, a bik takin Nou Camp-a hnehna chan hi player-te tan a pawimawh zual. Kan hlim em em a, he hian inrintawkna nasa tak mi pe ngei ang," tiin a sawi bawk.

Atletico chak chiang

Atletico Madrid chuan La Liga title an beiseina an chhawm nung zel a, Real Betis chu 5-1 a sawpin hmahruaitu Barca nen an inthlauhna chu point rukah an sawr zim ta.

Diego Simeone naute hian Real Betis lakah harsatna an tawk lo a, inkhel ṭan aṭanga a tawp thlengin an mikhual lakah an chungnung zia an lantir. Liverpool leh Chelsea striker hlui Fernando Torres chuan goal hmahruai khungin Antoine Griezmann-a'n goal hnih a khung bakah right-back Juanfran leh Thomas Partey te chuan goal an khung ve bawk.

Thawhleh zan hian Champions League quarterfinal first leg khelh ṭan a ni dawn a, Barcelona chuan Atletico Madrid an lo mikhual ang. Real Madrid chuan Nilaini zanah German club Wolfsburg an lenchih thung ang.

Ngaihnawm

• Karim Benzema-a'n kum 2012 January hnua a vawi khat nan Nou Camp-ah goal a khung a, kum 2011-12 season-a a goal khung zat goal 21 na chiah a ni nghe nghe.

• Real Madrid coach zingah Zinedine Zidane chu kum 2007-08 a Bernd Schuster hnua La Liga-a Clasico ahmachhawn hmasa bera tlawm lo hmasa ber a ni.

• Sergio Ramos hi tun hnai season 10 chhungin El Clasico-ah vawi li hnawhchhuah a ni a, ani aia red card hmu hnem an awm lo.

• Cristiano Ronaldo hian inelna hrang hrangah Barca a hmachhawn hnuhnung pangaah goal li a khung a, Messi erawhin Real a hmachhawn hnuhnung vawi ngaah goal a khung lo a ni.

• Cristiano Ronaldo chu El Clasico-ah goal khung hnem ber pathumna a ni ta a, goal 16 khung tawhin Raul (15) a khum ta. Goal khung hnem ber eawrh Messi (21) a ni.

• Barcelona hian hneh loh nei loin match 39 chhung an kaltluang tawh a, Spanish club zingah record nei ṭha ber an ni. Mahse tunah chuan Real lakah an record an chhawm nung thei lo.