Spurs chelhtu Reds; Hammers chak zo lo
Kum 55 hnua league no-mawi chawi tumin Tottenham Hotspur-in hmahruaitu Lei-cester City an um a; nimahsela an kal-kawngah Liverpool an inrawlh a, Inrinni zan khan team pahnih hi goal khat ve ve khungin an inhnehtawk.
Anfield-ah mualneitu Li-ver--pool-in Philippe Coutinho hmangin goal hmahruai an khung a, Harry Kane-a hmangin Spurs-in an sut a, point khat an hlawh chhuak hram.
Champions League khelh tum West Ham pawhin an ma-mawh point thum an hlawh chhuak thei lo a, an mikhual Crystal Palace nen inkhel hmuh-nawm takah 2-2 in an inhnehtawk.
Lloris Fakna!
First half-ah Liverpool tan Adam Lallana a khel ṭha takzet a, English midfielder hian hmuh-nawm taka a che vel karah goal khung theihna hun ṭha vawi hnih a nei a, mah se Lallana hun ṭha neih hi Spurs keeper Hugo Lloris fakna mai a ni.
French keeper hian Lallana goal khung tur pahnih a dan bakah hian Daniel Sturridge-a hun ṭha neih chu engmah lohah a chantir bawk. Minute 51-naa Coutinho goal khung erawh Lloris tan tih ngaihna a awm lo a, Sturridge-a ball pass
ṭha tak chu Brazilian midfielder hian awlsam takin a khung. Cou-tinho-a'n hun tawp lamah Liverpool chakpuina hun ṭha nei mah se a chhawr ṭangkai thei lo bawk.
Mauricio Pochettino-a naute hun ṭha nei lo tawp an ni bik lo a, tun hnaia sawisel hlawh tak Liverpool keeper Simon Mignolet-a'n Christian Eriksen leh Mousa Dembele-te goal khung tur ṭha takin a dan sak a, Son Heung min-a'n Eric Dier-a ball pass ṭha tak chu holam takin a chhuah bawk. Minute 63-naa Harry Kane-a goal erawh striker goal a ni a, defender Dejan Lovren-a ven hneh loh striker hi Mignolet-a'n a dang zo bik lo.
Manager thukhawchang
Liverpool boss Jurgen Klopp chuan, "Tottenham-in nomawi beiseiin inkhel an hmachhawn a, keini chuan point thum hmuh tumin kan bei a ni. Mahni inrintawkna kan mamawh a, hnehtu nih kan zir a ngai a, kawng dik kan zawh mekin ka hria. Tihsual kan nei tam lo a, kan tihsual erawh insiamṭhat nan kan hmang ang," tiin a eng zawngin hmalam a thlir.
Spurs boss Mauricio Pochet-tino chuan, "Point hnih kan hloh a, mah se kan hmabakah match ruk a la awm avangin theihtawp kan chhuah chhunzawm zel ang. Zaninah khan tum kan nei a, nomawi chawi kan duh a ni tih kan lantir a ni," tiin a naute khelh dan a sawisel duh lo.
Hammers an chelh
Inrinni zan West Ham khelmuala inkhelah beisei loh result kan hmu a, Season ṭha tak hmang mek Hammers khelmualah mikhual tlangnel Crystal Palace-in point khat an hlawh chhuak.
Inkhel ṭan aṭanga minute 15-na lekah beisei loh zawk mikhual team tan Damien Delaney-a'n West Ham goalkeeper Adrian chetsual zar zoin hnai set sawt aṭangin a khung a, Hammers fan-te an hawihai.
Mahse, West Ham an talbuai rei duh lo a, Manuel Lanzini-a'n minute thum hnu leka an si phurh a sut hnuah Dimitri Payet-a'n free-kick
aṭangin goal ropui a khung bawk. Second half-ah Ham-mers 2-1 in an chungnung zawk.
A vawi khat nana Cham-pions League khelh tum Hammers vanduai inṭanna erawh red card a ni. Minute 67-naah Cheikhou Kouyate chu Dwight Gayle laka a foul vangin hnawhchhuah a ni a, Kouyate hian Gayle hi tawk fuh ngei mah se direct red card inpekna chi nia a lan loh avangin referee Mark Clattenburg chungah Hammers an lawm lo khawp ang.
Players kim loa Hammers an khelh aṭanga minute riatnaah Palace-in Gayle hmangin an si phurh an sut zo a, player 10-a khel Hammers tan chak turin tih theih a tam tawh lo.