Khatla-in Zarkawt hnehin final an lut

Zarkawt Serpents-in Mizoram Super League Semifinal Game 2-ah final luh châkna lantir mah se, Khatla TBL an chelh zo lo. Champion lai Khatla-in 60-58 a hnehna changin a zawna final lut thei hmasa ber an ni.

Khatla TBL-in game 1-ah Serpents 71-66 in an hneh tawh a, game 2-ah hnehna an chan leh bawk avangin game 3 khelh a ngai dawn lo. TBL-in final an lut a, Mission Veng Vikings leh Tuikual South chak zawk nen April 15 hian final Game 1 an khel ang.

Serpents an liam

Ruahsur vangin semifinal game 2 entu an tam tawk lo a, inkhel hmuhnawmna erawh a tlahniam lo.

Khatla TBL-in chak lo thei an ni tih an hria a, City Police training lai Gospel Lalthawmmawia leh R. Lalmalsawma te an la chhuak a, an tifuh hle.

Khatla TBL tan game 1-a che ṭha Eddie Zothanmawia bawk a langsar a, Khatla rawlthar hian defensive leh offensive-ah rebound a la thei a, point score-tu ber a ni bawk. Serpents tan an veng tlangval Lalsangkima che tha lo mah se KC Hruaia leh Lianhmingmawia te hmangin an um ve ngar ngar. Hawla Indoor Stadium chung a phui tawk lo a, court-ah tui far a awm avanga ball nal leh fimkhur loh vangin turnover a tam phah hle.

MVP nilai H. Laldinsanga'n TBL chu hmun hima a dah tawha a ngaih hnuah a teammate-te tan chance a pe a, Serpents-in umphakna remchangah an hmang thung.

Minute li leh second 51 chauh a awm tawh tih chuan Serpents-in 55-54 in hma an hruai a, khuavang kal lai ang maia a reh reng hnuah minute khat leh second 38 a awm tihin Gospel-a'n TBL hmahruaina a lut chauh. Minute thum chuang hret team pahnihin basket an neih loh lai hian Mapuia pawhin freethrow vawi hnih a hlah.

A tawpah erawh Ma­puia bawk a langsar a, Gospel-a siamsaktu hi Mapui-a a ni a, hemi hnu hian point thuma an fal nan pui takin a layup leh bawk. Serpents veteran player Liama'n 3 points a score a, 58-58 a ni. Inkhel boruak a sang a, point luh harsat zanah Gospel-a'n basket pawimawh khungin Khatla TBL a chak pui.

Zarkawt boss thukhawchang

Serpents manager Dino Laldinpuia Chhangte chuan, "Kan player-te an khel ṭha a, an fight tel bawk. A bik takin 4th quarter kha kan khel ṭha lehzual. Keini aiin Khatla TBL an khelṭha hret a, an vannei tel bawk. Ka player-te an khelh danah ka chhuang hle," tiin a sawi.

Zarkawt Serpents boss Dino chuan mipui chungah lawmthu sawiin, "Game 1 kan chak lo chunga game 2-a Zarkawt mipuiten ṭha taka min ṭawiawm avangin an chungah kan lawm a, an duh ang result kan hlawh chhuak thei lo erawh pawi kan ti," a ti.

Serpents hian final thleng zo lo mah se MSL1-ah pangana an ni a, MSL2-ah Zarkawt club pahnih zinga che ṭha zawk an nih bawk avangin season an khar danah an lunghnur lo ang.