Villa mualphona belhchhatu Chelsea

Premier League mawngphah luahlumtu Aston Villa an tho thei lo a, Remi Garde chhuah hnua an match hmasa berah Chelsea-in 4-0 in an sawp. Villa mualphona belhtu zinga player langsar ber chu Alexandre Pato a ni - Stamford Bridge a pan aṭanga ni 64-naa a match hmasa ber kheltu striker hian goal a khung nghal.

Villa tan season thara Premier League khelh zel beisei ngam chi a ni tawh lo a, Paul Lambert-a enkawlna hnuaia 2013-14 season-a an khelmuala match 10 an tlawm chu Inrinni zan hian an nihrual chiah.

Chelsea tan Ruben Loftus-Cheek chuan minute 26-na lekah goal hmahruai a khung a, first half hun pek belhah Pato chuan penalty aṭangin an goal hnihna a khung bawk.

First half-a roreltu Chelsea-in second half-ah ro an rel chhun-zawm a, Pedro chuan chawlhlawk hman zawh a nih aṭanga minute 1-na lekah goal a khung a, minute 59-ah goal khat dangin a chhunzawm. Player kim chung pawha khel ṭha lo Villa an talbuai a, minute 85-naah Alan Hutton chu hnawhchhuah a ni.

Magpies an tlawm

Newcastle United-in result ṭha zawk beiseiin Real Madrid manager hlui Rafael Benitez la lut mah se UEFA manager of the Year ṭum hnih lai ni thei enkawlna hnuaiah meuh pawh Magpies-in chak result an hlawh chhuak thei lo a, Norwich City khelmualah 3-2 in an tlawm.

Premier League-a inhamtan tum team pahnih inkhelah hian mualneitu Norwich-in Timm Klose leh Dieumerci Mbokani-te goal hmangin vawi hnih hma hruai mah se Magpies-in Aleksandar Mitrovic-a goal khung pangngai leh penalty hmangin an si phurh vawi hnih an sut a, injury time-a Martin Olsson-a goal khung erawh sut turin hun a awm tawh lo.

Newcastle boss Rafael Benitez chuan, "Engkim a harsa tawh a, mahse kan ti thei a ni tih hi kan inring tlat tur a ni. Kan match leh aṭanga chak dan kan zir a nih phawt chuan hun kan la nei a ni," tiin Premier League khel zel turin beiseina a la nei.

City chak chiang

Season thara Champions League khel thei lo dinhmuna ding Manchester City-in an top four beiseina chhi nung turin Bournemouth chu 4-0 in an sawp.

Bournemouth khelmuala inkhelah City tan Fernando chuan goal hmahruai a khung a, a hliam dam hnua a match hmasa berah De Bruyne chuan an goal hnihna khungin Sergio Aguero-a'n a belhchhah ve leh bawk. City goal hmasa pathumte hi minute 19 chhunga lut vek niin Bournemouth-in tih theih an nei tlem hle.

First half-a an goal khung dan ngaihtuahin City hi goal tam zawk khung tura beisei ni mah se goal dangin an goal hmahruai pathum a zui lawk thei bik lo a, minute 93-naah Aleksandar Kolarov chuan an goal lina hi a khung ve chauh a ni.

City boss Manuel Pellegrini chuan, "Kan khelh dan kha ka duhdan tak a ni a, kan khelhdan ṭhin pangngaia kan khel leh thei hi ka lawmna chu a ni. Kan khel ṭha em em a, a bik takin first half-ah khan kan khel ṭha lehzual a ni," tiin a lawm hle.

Inkhel dang

Inrinni zan Premier League inkhel dangah Stoke City leh Swansea City chu goal hnih ve ve khungin an inhnehtawk a, Stoke City tan Ibrahim Afellay leh Bojan Krkic-te'n goal an khung hnuah an inthlahdah a, Swansea-in Gylfi Sigurdsson leh Alberto Paloschi hmanga an si phurh sut zoin an inhnehtawk.

Championship lama tlak hlau Sunderland dinhmun a him lo zel a, an mikhual West Brom chu goal khung loin an inhnehtawkpui. Black Cats hian Fabio Borini leh Jermain Defoe-te hun ṭha neih an chhawr ṭangkai thei lo chu an ui khawp ang.