Bayern chakna Ribery goal ropui

Season li chhung a zawna Bun-desliga nomawi chawi turin Bayern Munich dinhmun a ṭha zel - Pep Guardiola-a naute hian Inrinni zan khan Franck Ribery-a goal ropui hmangin Eintracht Frankfurt chu 1-0 in an hneh.

Inkhel ṭan aṭanga minute 20-na lekah Ribery hian goal hi a khung a, Mario Gotze goal shot ṭha tak chu Frankfurt keeper Lukas Hradecky-a'n a dan per hnuah Ribery hian dan rual loha mawi leh ropuiin a lo volley a ni. Tun season-a hliam vanga buai fo Ribery tan a goal khung hi tun season-a a goal hnihna chauh a ni.

Bayern manager Guardiola chuan, "Frank-a goal khung ropui piah lamah khan kan khel ṭhain kan thawkrim hle a ni. Goal hnih khung thei ni ila chu engkim kha a awlsam tur a ni a, tunah chuan Benfica lamah kan rilru kan pe leh tawh ang," tiin naktuk zana Portuguese club nen Champions League quarterfinal an khelh tur a thlir lawk.

Bundesliga inkhel dangah league table-a pahnihna Borussia Dortmund chuan 3-2 in Werder Bremen an hneh a, Dortmund tan Pierre-Emerick Aubameyang, Shinji Kagawa leh Adrian Ramos-te'n goal khat ṭheuh an khung a, mikhual team tan Alejandro Galvez leh Zlatko Junuzovic-te goal khung a tawk zo lo.

Signal Iduna Park khelmuala inkhelah hian Dortmund fan-te chuan tun hnaia an club lama kir leh tur anga an sawi Liverpool nen pawha sawizawm Mario Gotze duh lohna banner hmangin an lantir a, 'Milan emaw Madrid pawh ni rawh se - a pawimawh ber chu Dortmund-a i lo kir loh hi a ni, lo kiang rawh le Gotze' tih chu stadium chhungah a langsar hle.

Kum 2013-a euro maktaduai 37-a Dortmund aṭanga Bayern Munich pantu an player ṭan rawn ni ṭhin hi Dortmund fan-te'n an la ngaidam lo niin a lang.