City hmachhawn turin Ibra a inpuahchah

Nilaini zana Man-chester City nena Champions League quarterfinal khel tur Paris St-Germain striker Zlatan Ibrahimovic chuan Inrinni zan league match in warm-up nan a hmang a, 4-1 a Nice an hnehna inkhelah hat-trick a siam.

Swedish striker hian inkhel ṭan aṭanga minute 15-na lekah angle chep tak kar aṭangin a goal hmasa ber a khung a, Hatem Ben Arfa chuan mikhual team tan a sut.

Mahse, Ibrahimovic-a'n goal hnih dang khung lehin David Luiz chuan goal khat dang a khung ve bawk a, inkhel a tawp meuh chuan PSG an chak chiang hle.

Ibrahimovic-a'n tun season league match 26 a khelhah goal 30 a khung tawh a, PSG tan Ligue 1 match 117 a khelh tawhah goal 105 a khung tawh bawk.

March thlaa Ligue 1 nomawi chawi tawh PSG striker Ibrahimovic hian nipui transfer bazar inhawn rualin French club hi a chhuahsan tawh dawn a, kum 34-a upa striker hi a kum tam tawh mah se Premier League club zingah Manchester United, Chelsea leh Arsenal-te chuan an duh nia sawi a ni.