Juventus-in nomawi an hnaih zel

Inrinni zan khan Juventus chuan league match-ah 1-0 in Empoli an hneh a, Serie A-ah hma an hruai chhunzawm zel. Juventus hnuaiah hian Napoli awmin nizan khan an inkhel a, team pahnih inthlauhna point nga chu Napoli result a zira danglam leh thei a ni.

Inkhel ṭan aṭanga rei lo teah Alvaro Morata chuan crossbar-a pet per a, minute 44-naah erawh Turin club an vanduai nawn tawh lo. Mario Mandzukic chuan Paul Pogba-a ball chip ṭha tak chu he inkhela goal awmchhun ni turin a tauh lut.

Massimiliano Allegri-a naute hian Kwadwo Asamoah leh Simone Zaza-te hmangin goal dang khungna hun ṭha nei mah se an hun neih an chhawr ṭangkai thei lo a, 1-0 in an chak.

Juventus tan an league match hnuhnung 21-a an vawi 20 chakna ni mah se Turin club hian lawm lohna tur an nei a, an defender pawimawh Giorgio Chiellini chu hliam vanga lakchhuah a ni.

Allegri chuan a player chung-chang hi sawiin, "Chiellini hi inkhelh hma kha chuan a dam ṭha hle a, a hliam hi eng ang tak nge a nih kan zir chiang ang. Hliam na tak a nih loh hram ka beisei," a ti.

Hetihlai hian Italian manager chuan Juventus-a cham chhunzawm zel a tum thu sawi nghalin, "Rei lo teah club nen kan in dawr ang a, contract thar ka ziak thuai ang. Juventus hi ka chungah an hlim a, keipawh he hmunah hian ka hlim avangin chhuah nachhan tur ka nei lo," tiin Italian club-ah chuan a hlim thu a sawi.

Inrinni zan Serie A inkhel dangah Sassuolo leh Carpi an inhmachhawn bawk a, mikhual team Sassuolo hian 3-1 in hnehna an chang.