Mizo footballer-te tualchaina I League Chakna goal khungtu Samuel leh Daniel

Zirtawpni zanah Aizawl FC-in Shillong Lajong hneh lo mah se kartawp I League inkhelah Mizo footballer-te hmangin India ramah Mizo hming a mawi hle.

Khaikhawmna

Aizawl FC-in champion lai Mohun Bagan an hneh hnua an match hmasa berah Shillong Lajong an hmachhawn a, Joel Sunday hmangin minute hnihna lekah MPL champion-in goal an khung. Aizawl FC-in point thum hmu tura an insuangtuah rei hmain Brazilian striker Fabio Henrique Pena chuan minute 17-na leh 18-naah Lajong tan goal a khung a, Samuel Lal-muanpuia'n minute 38-naah chak nemnghehna goal a khung leh bawk. Aizawl FC-a awm ve zawk tawh Zemabawk North rawlthar Samuel hi a phu ang ngeia hero of the match-a thlan a ni.

Aizawl FC inkhelh hma hian Mizorama rawn la zin tur Salgaocar leh DSK Shivajians te Goa-ah goal khat ve ve khungin an inhnehtawk. DSK lam hian Baljit Sahni hmangin hma hruai mah se mual neituin Swansea player hlui leh I Lea-gue top scorer ni tawh Dar-ryl Duffy hmangin an sut.

Inrinni tlaiah Kanchen-chunga Stadium-ah Kolkata Derby khelh a ni a, East Bengal captain chu Robert Lalthlamuana niin Mohun Bagan striker chu India tana captain armband hreng zo hlim Jeje Lalpekhlua a ni.

Red and Gold Brigade-in Dong-Hyun Do (40',75') goal hnihin hma an hruai a, minute 83-naa captain Yusa Katsumi tauh goal hmangin Mariners-in beiseina nei mah se hun tawp dawnah Jeje-a'n ama penalty hlawhchhuah chu goal-ah a chantir thei lo. Mizo tlangval captain-na hnuaiah East Bengal a zawnin vawi hnih a chak a, champion an beisei ngam leh ta.

Zan lam inkhelah Bengaluru FC-in an club history-a an la hneh ngai loh Mumbai FC chu Sree Kanteerava Stadium-ah an mikhual a, goal a lut lawk lo. Amaherawhchu minute 74-naah Ashley Westwood-a'n Mizo rawlthar pahnih Malsawmzuala leh Daniel-a te luhtirin Serchhip forward hian Vineeth-a thawhrah sengin minute 81-naah chakna goal a khung.

Kolkata Derby

East Bengal captain Robert chuan, "Jeje-a'n penalty a pet dawn khan kan in draw ngei turah ka ngai hman tawh," tiin Jeje-a a rintawk thu a sawi.

Khawzawl tlangval chuan sawi chhunzawmin, "Captain ka nih vanga chak kan ni lo a, Pathian hruaina vang chauh a ni. Kan vanneih vangin kan chak a, tun season hi kan vanneih ngei ka beisei," tiin Vanglaini palai a hrilh.

Kokata Derby-a penalty pet ngam Jeje chuan, "Pathian remruatna zawk aniang. Ṭan leh zualna min pek ngei ka ring. Kan khelh leh turah team chakpuitu nih ngei ka tum ang," tiin penalty a pet goal loh chungchang Vanglai palai a hrilh.

Samuel leh Daniel

Lajong leh Bengaluru tana chakna goal khungtu Samuel leh Daniel te hi an chenna Zemabawk North leh Serchhip-a SSA Academy aṭangin football an zir a, Chandigarh Football Academy-ah an awm dun leh.

Samuel hian Chandigarh
aṭangin kum 2014 khan Aizawl FC a zawm a, MPL3 squad-ah ziah luh ni mah se thla hnih pawh a la awm hmain Shillong Lajong a zawm.Zemabawk North forward hian February 21-a DSK an tlawh ṭumin I League a khel ṭan a, Pune club hi an mikhual ṭumin bench-ah awm leh mah se Bengaluru, Salgaocar leh Aizawl FC an khelh ṭumin starting eleven a chang vek.

Lajong-in Aizawl FC an hneh ṭuma hero of the match Samuel chuan, "Goal ka khung kha ka lawm lutuk a, ka beisei loh a ni. Ka rilruah engmah ngaihtuah ka nei tawh lo a, ka goal khung kha ka lawm ta chiam a, ka la tawn ngaih loh thil a nih vang a ni. Aizawl FC tih elna a awm lo a, tawnhriat ka la neih tlem vang zawk a ni," tiin Vanglaini palai a hrilh.

Zemabawk North tlangval chuan, "Hero of the match nih hi tun season-ah ka beisei lo a, tun dinhmun ka thlen theih nan hian SSA-a kan coach Sir C. Vanlalhriatrenga leh Sir Zoram-muana-te an pawimawh a ni," tiin amah chhertu a theihngilh lo.

Daniel-a hi la naupang mah se India ram football-ah mi thar a ni tawh lo. Serchhip tlangval hi India junior team captain hlui a ni a, Bengaluru FC-in Aizawl an rawn tlawh ṭum khan inhiam vangin a rawn zin lo.

Khami ṭum khan BFC assistant coach Pradyum Reddy chuan, "Daniel-a hi practice-naah a che ṭha em em a, Robin Singh nen inhliam lo ve ve se an pahnih inkarah starting eleven thlang dawn ila Daniel kan thlang ang," tiin a ṭhat thu a lo sawi tawh.

Goal chungchang sawiin Daniel-a chuan, "Bengaluru FC-in Mumbai FC an la hneh ngai loh avangin I League-a ka goal hmasa ber hi a nawm dan a danglam khawp mai. Pathian vang liau liau a ni a, ka kal zelna turah Mizo mipui ṭawngṭaipuina ka mamawh a ni," tiin Mizo mipuite chu amah theihnghilh lo turin a ngen.