I League-ah Aizawl FC an him em?

Aizawl FC-in I League champion lai Mohun Bagan an hneh hnuah an phur vanglai takin Shillong-ah an zin. Lajong lakah 1-3 in an tlawm. Pangana aṭangin pariatnaah an tla thla a, an hnuaia awm chhun Mumbai FC nen an point hmuh zat a inang bawk.

An him lo

I League table thlirin Aizawl FC an him lo tih a chiang a, dinhmun chhe ber erawh an ni bik lo. MPL champion hian RG Stadium-a DSK Shivajians an hneh hnuah an phur hluai a, player ṭha Odafe Onyeka Okolie, Densil Theobald, Loveday Enyinnaya leh Rowlin Borges te awmna Sporting Goa chu hneh tur chiangah an ngai. Spanish coach Manuel Retamero hoten point thum hmuh an duh luatah attacking game an khel a, point khatmah an hmu lo.

Spanish coach aiah Jahar Das leh K. Malsawmkima te an la lut a, an result ṭha chho viau mah se an chetsualna ngaiah bawk an tawlh thlu. Mohun Bagan an hneh avangin Aizawl FC-in an elpui team ṭhatna an hmuh hmaih a, Shillong Lajong lakah point thum hmuh tumin an zin a, mahni goal ven aiin nawr an thlang a, point khatmah an hlawh lo.

Lajong-in Aizawl an rawn tlawh
ṭumin point khat hmuh pawi an ti lo a, defensive game an khel a, an duh ang result an hlawh chhuak. Thangboi Singto-a'n an mualah point thum hmuh a tum thu a sawi a, a sawi sual lo. Lajong-in an theihna chin an hria a, Aizawl FC aiin an dinhmun a ṭha tawh zawk.

Hmabak

Aizawl FC hian April 6 hian Sporting Goa chu khualmualah an tlawh dawn. April 11-ah Mizoram chhunga an match hnuhnung ber chu Salgaocar nen an khel ang. I League bika Aizawl FC match hnuhnung ber erawh DSK Shivajians nen Pune-ah April 16-ah an khel dawn.

I League round khatah team pakhat an awl zel a, Aizawl FC hi round hnuhnung ber khelh hunah an awl dawn. Chuvangin Aizawl FC hian midang result-a innghah an duh lo a nih chuan an hmabak match thum hi thiam taka an hmachhawn a ṭul ang.