Bayern-in Dusseldorf ngai pawimawh

Zanin hian dar 10:00 hian Bayern Munich-in Allianz Arena-ah Fortuna Dusseldorf an mikhual dawn. Bayern hi Bundesliga-ah hmahruaitu a ni a, an khingpui tur Dusseldort erawh 16-naah awm mekin relegate thei zinga mi an ni.

Bavarians hi chak chiang tura ngaih an ni a, manager Hansi Flick erawhin fimkhur a ṭul thu sawiin starting eleven thlak danglam chiam a la tum lo. Bayern hian Dusseldorf nen pawh hian hliam vanga Borussia Dortmund hmachhawn thei lo Thiago Alcantara an la chhawr thei lo ang.

Covid-19 zawh hnuah Bundesliga match thum khelh a ni tawh a, Bayern Munich an la chak vek. Heng match thumah hian Flick-a'n starting eleven hran vek a la hmang.

Hma tawngah Robert Lewandowski chu khawih chet phal loh tiha sawi theih an ni a, Polish striker thlawptute hi thlak danglam an ni. Serge Gnabry, Kingley Coman, Ivan Perisic leh Thiago te an inluh chhawk a, Spanish midfielder khelh chhunzawm loh chhan erawh a inhliam vang a ni ber.

Flick hian German player Thomas Muller, Joshua Kimmich leh Leon Goretzka te a chhawr rim a, Covid-19 hnuah heng player pathumte hian bul an la ṭan vek.  Tlarhnung lam pawh khawih danglam a ni lo. Goalkeeper-ah Manuel Neuer a awm a, defence laiah Jerome Boateng leh David Alaba te an inkawp. Mual vei lamah Alphonso Davies awmin ding lamah Benjamin Pavard a awm a, Bayern tlarhnungin hma a sawn zel.

Covid-19 vangin kar khatah match hnih khelh a ni a, khar hnih chhung lekin match li an khel dawn der. Heti chung hian Bayern Munich manager Flick-a'n risk lak a duh lo a, Bundesliga-a an champion chian hnuah erawh a ngaihdan a sawhsawn theih ang.

Midfield-ah Joshua Kimmich a thawkrim ṭhin hle. Germany international hian Borussia Dortmund lakah ringawt 13.73 a tlan a, 2013-14 season aṭanga player tlan dan chin a teh hnua Bayern tana tlan tam ber record a siam. Kimmich hi a tlan tam satliah lo a, Dortmund lakah hian goal mawi a khung.

Bayern player-te hi an inhliam emaw chau tawngkhawng emaw a nei a nih loh chuan champion turin a dinhmun a ṭha chho tawh a, Dusseldorf zawh hian Bayer Leverkusen, Borussia Monchengladbach, Werder Bremen, SC Freiburg leh Wolsfsburg an la hmachhawn dawn.

Bavarians tan Champions League khelh tum pahnih Leverkusen leh Gladbach te hi hmabak harsa a tih theih a, chutihrualin an squad chhahzia thlir chuan Flick-a hote el pha tur an ni lo.

Pathianni zan dar 9:30 hian Bundesliga inkhelah Borussia Dortmund-in Paderborn an tlawh dawn a, khup hliam vangin an striker goal khung khawl Erling Haaland a inlan theih a rinawm lo.

Dortmund hian an match hnuhnung berah Bayern Munich an hneh lo a, champion lai Bavarians hi point sarih zetin an pha tawh lo. Lucien Favre hote hian Bayern hma hian Schalke leh Wolfsburg te an hneh a, Covid-19 vanga inkhelh chawlh hnua an match hmasa berah Haaland-a'n Dortmund tan a khung hmasa ber.

Kum 19 mi Haaland hi goal a khung theih avangin Lionel Messi leh Cristiano Ronaldo te hmunruak hnawhkhat thei turin an sawi ṭan hial tawh. Norwegian striker hian tun season match 35-ah Red Bull Salzburg leh Dortmund tan goal 41 a khung a, a record a ṭha hle. Dortmund tan bik inelna hrang hrang match 14-ah goal 13 a khung.

Spanish chanchinbu Diario AS-in a zirchiannaah Haaland hian match 106 a khelh tawhah goal 62 a khung a, match tina 0.58 khung ang a ni. Hetiang kumah hian Messi-a'n match 63 khelin goal 20 a khung a, match tinah 0.31 a khung. Ronaldo pawh match 87-ah goal 12 a khung chauh a, match tina a goal khung tan ratio chu 0.13 chauh a ni.

Haaland-a goal khung zat goal 62 khung tur hian Messi-a'n match 132 a mamawh a, Ronaldo-a'n match 233 a mamawh. Hei hian Norwegian striker ṭhatna a pholang chiang hle. Pathianni zanah erawh Haaland a khel theih hmel loh a; Jadon Sancho, Julian Brandt leh Thorgan Hazard te mawhphurhna a sang 

sawt ang.