Watford sawptu Arsenal beiseina nung thar

Arsenal chu Premier League title chawi thei team aṭanga thai bo ngawt theih an la ni bik lo. Arsene Wenger a naute hian Inrinni zan khan an mikhual Watford chu 4-0 in an sawp a, point 58 hmuin table-ah pathumna dinhmun an luah chhunzawm.

Emirates Stadium-a inkhelah Gunners-in FA Cup aṭanga an mahni pet chhuaktu Watford lakah zahngaihna an lantir lo a; Alexis Sanchez, Alex Iwobi, Hector Bellerin leh Theo Walcott te hmangin goal an khung a, inkhelh ṭantirh aṭanga a tawp thlengin an mikhual lakah kawng engkimah an chungnun zawk zia an lantir a ni.

Arsenal hian an khelmualah inelna hrang hrangah a zawnin match thum chhung chak ni hmel an hmu loh hnuah an chak ve leh tak avangin an rilru nguai zualpui a ti reh maithei. Gunners hian an mahni aia match khata khel tam zawk Tottenham chu point liin an phak lo a, hmahruaitu Leicester City chu point riatin an phak lo mek bawk. Mahse nizana Foxes inkhel result a zirin an inthlauhna hi a danglam leh thei bawk.

Kum 19-a upa Iwobi hian a club tana a inlan vawi 13-ah goal a khung loh hnuah league-a inkhel bul a ṭan hmasa pahnhiah goal a khung ve ve a, Watford lakah hian crossbar a pet per bawk.

Arsenal manager Arsene Wenger chuan, "Goal kan khung tam bakah kan chhuah lo a, point thum kan hmuh avangin ka lawm hle. Alex Iwobi khelh dan khan minti lawm a, kha aia ṭha pawh khan a la khel theih tih ka chiang," tiin an goal hnihna khungtu a fak.