Balotelli kan la fuh lo - Cellino

Italian club Brescia neitu Massimo Cellino chuan Mario Balotelli an lalut chu an tih fuh loh thu a sawi a, an striker hi nipui bazar inhawn hunah a duh lam pana chhuah an phalsak ang.

Manchester City leh Liverpool tan pawha khel tawh Balotelli hian an khua a inbengbel club hi nikum nipui lai khan a zawm, goal nga khungsak tawhin Serie A table mawngphah luahtu an ni mek.

Cellino chuan, "Training-na hmunah a ti ṭha duh lo a, club tan a inpek loh bakah enkawl a harsa hle bawk. A nihna tak sawi chuan kan lalut hi a fuh lo. Balotelli hian Serie A club tan contract a nei a, division hniam lamah kan tla a nih chuan a khel zui lo ang.

"Ka hmuh dan chuan Italy hi a chenna tur a ni lo, a awmna tur hmun dik zawk a hmuh ka beisei," a ti. Italy-ah hian season kal laiah pawh mihang a nih vangin vawi hnih chu auh nawmnah a tawk tawh.