Zanin dar 12:30-ah Champions League semifinal Bayern Munich hmaah Lyon

Bayern Munich-in Champions League semifinal-ah zanin dar 12:30 hian Lyon an hmachhawn dawn. Bavarians-in final an thleng ngei dawnin a lang a, amaherawhchu French club hi Juventus leh Manchester City hnehtu an ni.

Football ngainatute duhthusam chu ni se, semifinal-ah Bayern leh Manchester City emaw Bayern leh Juventus emaw inhmachhawn se tih a ni ngei ang. Mahse football-ah beisei ang ngawtin thil a thleng lo a, chak tura mipui rin rawn an chak reng lo bawk.

Bayern Munich-in Spanish club lian Barcelona 8-2 in an sawp a, goal hmaah vannei phei se chuan goal 10 chuang an khung ang. Hemi a nih avang hian Bundesliga-a goal 100 khung thei Hansi Flick-a hote hian goal an khung ngei a rinawm hle.

Barca nen Robert Lewandowski-a'n goal khat chauh a khung a, amaherawhchu Lewy hian tun season-ah goal 54 a khung tawh a, UCL bikah goal 14 a khung. Polish striker hian Catalan club lakah goal khat chauh khung mah se a siamtu lamah a ṭang a, tlarhmaah a ṭangkai danin a la ṭangkai reng.

Bayern hian mual sir 

aṭangin Serge Gnabry, Ivan Perisic leh Kingsley Coman te hmangin an nawr ṭhin. Manchester City aṭanga an lakluh Leroy Sane la chhawr lo mah se Germany international awm hnuah Bavarians winger te inkarah inelna ṭha a awm an ti a, Arsenal forward hlui Gnabry ringawt pawhin tun season UCL-ah goal sarih a khung tling tawh.

Joachim Low-a'n Germany national team-a Thomas Muller a koh tawh loh tur thu a sawi khan mak tih a hlawh a, assistant coach-ah Flick nei se chuan Low hian thutlukna âtthlak hi a siam kher lo ang.

Flick erawhin Bavarians manager hna a chelh aṭangin Muller hi a ring nghal a, a rin tlak takzet. Kum 30 mi Muller a khelh dan hi 'ramdeuter' an ti a, hmun awl siamtu tihna a ni. Khawvelah Muller chauh hi ramdeuter a awm an ti a, Lionel Messi leh Neymar te angin ball thiam lo mah se German club ṭantute chuan Muller hi an dah sang hle. 

Bayern hian midfield-ah Thiago Alcantara, Leon Goretzka leh Philippe Coutinho te an kawl a, khelh dan inang lo, ṭha vek si an ni.

Bayern vanneihna chu tlarhnung buai kara Alphonso Davies rawn chhuak nawlh hi a ni a, Canadian wing back hi a naupan laia forward ṭhin a ni tih a khelh dan aṭangin rinhlelh tur a awm lo. Kum 19 mi Davies hian Barca tlarhma dang ringawt loin Spanish club tlarhnung a pal darh.

Flick atan chanchin lawmawm dang a awm. Right back rinrawl Benjamin Pavard a dam tawh a, amaherawhchu Joshua Kimmich-a'n a hna thar a hnehsawh bakah midfield-a Kimmich-a hmunruak luahtu Thiago-a a khelh ṭhat bawk avangin French defender hi bul a ṭantir ngam kher lo ang.

Bayern hi kil tinah an ṭha a, chutihrualin an tlarhnung erawhin buai chang an nei. Barcelona laka Bayern tlarhnung an buai leh zeuh ṭhin kha a mak lo - Bundesliga lamah pawh an buai fo. Flick-a'n Champions League final thleng turin tlarhnung a remdik a pawimawh ang.

Ligue 1 khelh zawh hmaa season tih tawp a nih tak avangin Lyon hi pasarihnaah an awm a, an dinhmun aṭanga thlir chuan French club vantlang an ni. UCL semifinal an thlen avangin Lyon boruak a ṭha vek bik lo, sporting director Juninho Pernambucano-a'n manto taka a lakluh pathum Jeff Reine-Adelaide (€27.5m), Joachim Andersen (€24m) leh Thiago Mendes (€25m) te chu manager Rudi Garcia-a'n semifinal-a Manchester City an hneh ṭumin bench-ah a dah vek.

Lyon club legend Juninho-a'n sporting director hna a chelhtirh hian manager Garcia hi an lakluh tum a ni lo, amaherawhchu tawnhriat nei ṭha Garcia an lak takah chuan a duh danin a kalpui ta thung. Club duh danin inkhel mawi a thlir lo a, result ṭha duhin ball chan tlem pawi a ti lo. 

French club hian Man City lakah khan 28% chauh ball possesion an nei a, an goal khung zat erawh goal thum a ni. Juventus an hneh ṭumin pawhin inkhel pahnihah chawhrualin 37% chauh ball possession an nei pha a, Bayern lakah pawh ball an chang tam lo ang. 

UCL-a an goal khung zat belhkhawm pawh goal 12 a ni a, Lewandowski goal khung zat pawh pha lo mah se mamawh huna goal khung thei tur Memphis Depay, Moussa Dembele leh Maxwel Cornet te an kawl - thilmak a thleng thei!