Hliam tuar Barcelona mikhual tur Atletico
Barcelona-in inelna hrang hrangah a zawna match 39 chhung hneh loh nei loa an kaltluang lai chu Inrinni zan khan Nou Camp-ah Real Madrid-in an thai chhiat sak. Luis Enrique naute rilru hliam a dam hmain zanin dar 12:15 hian Atletico Madrid nen Champions League quarterfinal an khel leh nghal dawn a, German champion Bayern Munich chuan Benfica an lo mikhual ve bawk ang.
Diego Simeone-a enkawl Atle-tico Madrid boruak ṭhat lai a ni a, an match hnuhung berah Real Betis 5-1 in an sawp. Mahse, zanina an hmachhawn tur Barcelona hi tun hnaiah inelna hrang hrangah a zawnin vawi ruk ngawt an hneh loh tawh avangin an fimkhur a ṭul dawn. He erawh theihnghih lo ila, Atletico hi tun season Cham-pions League bikah khual-mualah chak loh an la nei lo.
Barca lamin an khelmualah record an nei chhe bik lo. Spanish manager Enrique kaihhruaina hnuaiah Catalan Club hian Nou Camp-ah Champions League match 10 an khelh tawhah hnehna an chang fai vek bawk avangin an inkhel tur hian ngaihven a hlawh lo thei lo a ni.
Messi goal 500?
Tun season Spanish La Liga-ah Barcelona hian Atletico Madrid hi vawi hnih an hneh tawh a, Lionel Messi-a'n goal a khung ve ve.
Kar hmasa khan Argentina captain Messi hian Bolivia lakah goal khungin a senior career-a a goal 499-na a khung a, Real lakah goal 500-na khung thei lo mah se Madrid club pakhat zawk lakah hian a khung thei a nih chuan mel lung pawimawh bik a phun ang.
Barca thiampuipa dang tur hian Atletico centre-back Diego Godin leh Stefan Savic te an dam tawh a, manager Simeone-a tan defender pahnih dam hi thlamuanpui tham a tling. Hetihlai hian Barca lamah defender Jeremy Mathieu leh Adriano te dinhmun a chian loh bakah bakah Sandro Ramirez chu hliam vangin an la chhawr thei dawn lo.
Allianz Arena lam
Kum 1995 hnua a vawi khat nan Bayern Munich leh Benfica te Allianz Arena-ah an inhmachhawn dawn. German club hi Portuguese club lakah an la tlawm ngai lo a, vawi ruk an intawn tawhah vawi li an chak a, a bak vawi hnih an inhnehtawk.
Bayern hian a zawna vawi nga semifinal luh theihna hun
ṭha an nei a, Benfica erawhin kum 1990 hnua a vawi khat nan a sang paliah an in-hlangkai thei thung.
Pep Guardiola hote hian Franck Ribery goal ropui hmangin Eintracht Frankfurt chu Allianz Arena-ah an hneh. Bayern striker Robert Lewandowski chuan ṭha zawka an khelh a ṭul tur thu a sawi.
Benfica-in kartawpah Braga 5-1 in a sawp a, Portuguese league hmahruaitu hi Bayern hmachhawn turin an inpeih. Polish striker sawi ang hian Bayern hi an insiamṭha lo a nih chuan chesual thei an ni.
Guardiola-a'n defender pahnih Holger Badstuber (ngalrek) leh Jerome Boateng (ṭhal) te a la chhawr thei dawn lo chiang a, Javi Martinez (khup) leh Arjen Robben (malpui) te dinhmun a chiang lo bawk. Benfica boss Rui Vitoria-a'n goalkeeper Julio Cesar (malpui), defensive duo Lisandro Lopez (malpui) leh Luisao (kut) bakah midfielder Nuno Santos (khup) te a hmang thei bik dawn lo.
Allianz Arena-ah Bayern-in Champions League match hnuhnung 10 an la chak vek a, amaherawhchu Benfica hi Barcelona ang thoin tun season Champions League match zawng zawnga goal khung thei an nih avangin Bayern tlarhnung tan fimkhur a ṭul dawn.
France winger Franck Ribery chuan, "Pep hi Bundes-liga leh DFB Pokal-ah te a champion tawh a, Champions League nomawi a la chawi lo. A duhthusam chu Manchester City a zawm hmaa Champions League-a champion hi a ni," tiin ṭum dang zawng aia champion an tum thu a sawi.