Chelsea coach-ah Conte

Premier League club Chelsea chuan season thara an coach tur an puang a - a hming chu Antonio Conte a ni. Italy coach hian Euro 2016-a Italy a kaihhruai zawhah Chelsea hi a enkawl
ṭan ang a, season thum chhung Stamford Bridge-ah a cham ang.

Italian manager Conte chuan, "Kan ram team ka kaihruai thei hi ka inchhuang em em a, he hna ropui tak zawh ruala min thlem thlu thei awmchhun chu Chelsea enkawl hna hi a ni," tiin Blues a enkawl thei tur chu a lawm hle.

Chelsea-ah hian Ita-lian manager an lo awm nual tawh a, Conte hma hian Gianluca Vialli, Claudio Ranieri, Carlo Ancelotti leh Roberto Di Matteo-te chuan London club hi an lo enkawl tawh a ni.

Chelsea director Ma-rina Granovskaia chuan, "Football khawvela manager ropui ber pawl kan la lut thei hi kan lawm takzet a ni. Season zawh hmaa kan tichiang thei hi kan lawmna tizualtu a ni a, hmalam hun atana kan inbuatsaihna kawngah hei hian min pui dawn a ni," tiin manager thar an neih chungchang a sawi.

Kum 46-a upa Conte hian Italy a enkawl hma hian player a nih laia a khelh ṭhinna Juventus a enkawl a, Turin khaw club hi season thum chhung a zawnin league nomawi a chawipui thei.