I League nomawi inchuh boruak a sang

India rama football inelna sang ber I League-in season tawp a hnaih tawh a, champion nomawi inchuh team boruak tluk zeta ngaihnawm chu tlak hlaua table mawng lam team inum hi a ni.

Vawiin tlai dai 4:30-ah East Bengal leh Mumbai FC an inhmachhawn dawn a, Kolkata Derby-a chak hlim East Bengal hi an phur vanglai tak a nih avangin Mumbai tan khualmuala hmachhawn an châkawmin a rinawm loh.

Mohun Bagan-in vawi-in tlai dar 4:30-ah Shillong Lajong an lenchilh dawn a, Meghalaya club nena an inkhel tur hi Ten Sports lam-ah live-in a en theih ang.

Table mawngphah luahlumtu Mumbai FC-in season thara I League khelh chhunzawm zel an duh chuan chak loh a thiang tawh lo - vawiin tlai hi an tan fiahna hautak a ni dawn.

Mohun Bagan-in tun season I League match 11 chhung hneh loh nei loa an kaltluan hnuin RG Stadium-ah Aizawl FC an hneh lo a, Kolkata Derby-ah point khat hlawh chhuak thei dinhmuna an din laiin Jeje Lalpekhlua penalty pet goal loh vangin point thum an hloh a - zanin an inkhel tur hi insiamṭhat nan hman an tum ang.

Kolkata club tan Shillong Lajong zuam erawh a fuh lo thei - Meghalaya club hi an khelmuala Aizawl FC 3-1 a sawp zo hlim an nih avangin an phur vanglai tak a ni.

Lajong-in Aizawl an hneh ṭumin Mizo rawlthar Samuel Lalmuanpuia chu Hero of the match-a thlan a ni a, Bagan hmachhawn turin Zemabawk North rawlthar bakah Aizawl FC midfielder inkawp fuh David Lalrinmuana leh Yuta Kinowaki te dah nil tu Zodingliana Tochhawng chu a inlan leh ngei a rinawm.

Hetihlai hian India captain hlui Bhaichung Bhutia chuan I League nomawi chawi tura Mohun Bagan an la awm ber thu a sawi. 'Sikkimese Sniper' tia hminglem an vuah chuan, "Mohun Bagan hi an khelh dan en chuan champion turin an la awm ber a, Kolkata Derby-a an chak loh ṭum pawhin an khel ṭha em em tho a ni," a ti.

Bhaichung chuan Jeje-a fuih nghalin, "Jeje hian a penalty pet goal loh kha a theihnghilh tur a ni. Hmalam panin kal zel rawh se, keipawhin penalty ka hlah zozai kha ka chhiar seng tawh lo," tiin penalty pet goal loh chu football-in a ken tel ve reng a nih thu sawiin Hnahthial tlangval a fuih.