Leicester City point 7-in an fâl ta

King Power Stadium-ah Leicester City an chak leh tawh, captain Wes Morgan chuan sawisel theih miah loin minute 38-naah a tauh lut. Inrinni zanah Tottenham Hotspurs leh Liverpool te an inhnehtawk a, Pathianni zan lamah Foxes tan Southampton hneh nan captain Morgan goal khat lek a tawk bawk avangin match ruk chauh khelh tur awm tawhah Claudio Ranieri hote point sarihin an fal ta.

Champion?

Leicester City hian Sunder­land, West Ham United, Swansea City, Manchester United, Everton leh Chelsea an la hmachhawn dawn. An hnuai chiaha awm Tottenham Hotspurs an chak vek a nih pawhin Foxes hian nomawi chawi turin match li chiah chak an mamawh tawh.

Claudio Ranieri hote tan an hmabak match hnih hi a pawimawh zual ang. April 10, Pathianni zanah Stadium of Light-ah relegation zone-a awm mek Sunderland an tlawh dawn a, Black Cats hian Foxes hi an hneh lo a nih chuan Premier League khelh zel a huphurhawm dawn avangin Leicester tan an chakna match hnuhnung pali aiin an khelh leh tur hi a harsa zawk.

Black Cats zawhah Europe-a inlan tum ruh tak West Ham an mikhual leh dawn a, Dmitri Payet cheṭha chho viau mah se Hammers-in Crystal Palace an draw avangin Europe-a inlan thei lo dinhmunah an ding. Slaven Bilic hoten match zawna point an hloh a nih chuan an chung chiaha awm Manchester United el phak a harsa dawn a, point hloh a thian tawh loh avangin Foxes hmabak a harsa sawt.

Beiseina nung

A harsa lai sawi duh tlat tan chuan Leicester City cham­pion loh theih dan a tam a, amah­erawhchu an champion theih ring hi an tam tawh zawk a, an chetsual chuan thilmak a ni tawh zawk ang. An elpui Tottenham hian Manchester United, Stoke City, West Brom, Chelsea, Southampton leh New­castle an la hmachhawn dawn, Mauricio Pochettino hote cheṭha mah se an hmabak match rukah hian point an hloh leh dawn.

Spurs baka Leicester beiseina titawp thei Arsenal khelh hma­bakah West Ham, Crystal Palace, West Brom, Sunderland, Norwich City, Manchester City leh Aston Villa an la awm. Heng match sarihte hi an chak vek a nih chuan tunhnaia kan hriat Arsenal a ni lo tihna a ni ang.

Leicester hi match li chhung chu a zawnin an chak leh tawh a, an chakna zat hi goal khat zel a ni. Foxes hian beiseina nen an khel a, point an hlawhchhuak zel e.

Champion zia

Pathianni zanah Leicester-in ṭum dang an phak lo a, amah­erawhchu champion team-in an mamawh vanneihna an nei tel tlat.

Southampton forward Sadio Mane chuan keeper Kasper Schmeichel a bum tawh hnuah Danny Simpson-a'n a kutin a dan sak. Senegalese forward-in a pet goal thei lo kha Foxes vanneihna hmasa a ni a, referee-in Saints penalty a pek loh baka red card a phawrh loh avangin Ranieri hote an vannei takzet.

Goal khat phur tur zawka ngaih Foxes-in goal an khung ta zawk a, minute 38-naah vei lam aṭanga Christian Fuch-a cross chu Wes Morgan-a'n a tauh lut. Foxes skipper hian Leicester tan tun season-ah a goal khatna a khung.

Second half-ah Foxes van­neihna a kaltluang a, penalty area-ah ball-in Robert Huth-a kut chiang takin fuh mah se referee-in penalty a pe tlat lo.

Foxes hi an vanneih tih theih rualin goal tam zawk khung theihna hun ṭha an hlah ve tho. Saints keeper Fraser Forster ṭum khat aia tam goal ngei tura ngaih a dang a, first half-a Foxes chhandamtu Simpson-a'n hnai tak aṭangin chak nemnghehna goal a khung thei lo. Leicester defender Morgan leh Huth ten an pahnih belhkhawmin vawi 20 zet ball clear an nei a, an hmaa ding N'Golo Kante a chet ṭhat leh bawk avangin goal an chhuah lo.

Koeman a lawm lo

Southampton manager Ronald Koeman chuan, "Match thum a zawnin 100% a penalty pek ngeina tura ngaihah penalty pek kan ni lo a, tun ṭumah phei chuan ṭum hnih lai a thleng. Leicester hian chak an phu lo ka ti lo a, amaherawhchu penalty bakah red card kha chu pe se chuan an chak lo tawp ang," tiin referee vanga inkhel result a danglam thu a sawi.

Foxes lam

Foxes manager Claudio Ra­nieri chuan, "Tun season hi mu­mang ram ang mai a ni tih kan pawm a, season thar erawh a dang ang. Kan theih tawka
ṭhain kan khel a, team dang chu 3-0, 4-0 pawhin an chak thei ang, keini erawh 1-0 hi kan tlin tawk a ni. Kan kalna tur kawng kan rah hmain kan bihchian hmasak zel a pawimawh a, tuna kan dinhmun avang hian kan buai phah lo. Kan thil tihah hian kan chiang a, result hmangin min ringhleltute kan chhang a ni," tiin a inringtawk hle.