Miami champion Djokovic-a'n Paris a thlir
Novak Djokovic-a'n Kei Ni-shi-kori chu straight sets a hnehin a vawi ruk nan Miami Open champion title a chawi a, he hmuna nomawi vawi ruk lo chawi tawh Andre Agassi record a nih rual chiah.
Pathianni zana final khelhah world number 1 hian Japan tlangval Nishikori lakah hian darkar khat leh minute 26 chhungin 6-3, 6-3 in a hnehna a chang. Kum 28-a upa Djokovic hian Masters tournament bikah title 28 a lakna chiah a ni bawk a, Rafael Nadal (27) chu a khum chiah bawk a ni.
Serbian thiampuipa chuan, "A nuamin a hlimawm takzet. Ka hlawhtlinna hian phurna min pein ṭum dangah pawh ka la champion leh theih ka beisei," tiin a sawi.
Djokovic hi Indian Wells-Miami Open-ah a zawna vawi thum champion thei hmasa ber a ni a, ATP lawmman pound maktaduai 69 dawng tawhin tennis player zingah lawmman aṭanga sum la lut hnem ber a ni ta der mai!
ATP ranking chhuak thar berah Djokovic hian point 16,450 hmuin hmahruaitu a nih chhunzawm zel a, a hnuai chiaha awm pahnihna Andy Murray (7,815) leh pathumna Roger Federer (7,695) te pahnih point belhkhawm 15,510 ai pawhin a tam zawk a ni.
Novak a ṭha lua
Kum 26-a upa Nishikori hian set khatnaah Djokovic service a chhuhsak a, mahse a zawnin world number 1 lakah hian a service a hum zo lo zui ve thung.
Djokovic hian set hnihnnah pawh a zawnin game li a la thei a, a vawi nga nan Nishikori sercive chhuhsak zuiin a chak nuamsa hle a ni.
A khingpui a ṭhat thu sawiin Nishikori chuan, "Djokovic ṭhat lohna lai zawn hmuh hi a harsa a ni. Kan inkhelh ṭan hma khan chak theihna turin ruahmanna ka nei a, mahse court-ah erawh ka duhdanin ka hmang chhuak thei lo thung. A defending a
ṭha em em a, a ṭul hunah na taka min nawr theih bawk avangin khawvela ṭha ber a ni tih a chiang rih viau," tiin a sawi.
Sum ngah ngah hmelṭha
Tennis player zingah sum ngah ngah hmelṭha tia kan thlang dawn a nih chuan Djokovic hi pakhatna a a ni ang. A career-a match 714 hnehna chang tawhin lawmman aṭang bikin pound maktaduai 69 a dawng tawh a, ani ai dawng hnem an awm tawh rih lo.
Grand Slam vawi 17 cham-pion tawh Federer chuan pound maktaduai 68.8 dawng tawhin pahnihna a ni a, pathumnaah chuan Nadal awmin Grand Slam vawi 14 champion tawh hian pound maktaduai 53.7 a hui lut tawh thung a ni.
Paris lam hawiin
Grand Slam vawi 11 cham-pion tawh Djokovic hian Aus-tralian Open, Wimbledon leh US Open-ah te hlawhtlinna a chang vek tawh a, major tournamnet-a a la hlawhtlin lohna awmchhun chu French Open chiah a ni tawh.
Nikum khan French Open final-ah khan Djokovic hian Stan Wawrinka hneh loin pahnihna a ni nghe nghe. Kumina Grand Slam pahnihna tur thlir nghalin, "Tunah hian zauthau a hun lo a, ka hmabak a lian ber chu French Open leh Olympic lo awm tur hi a ni ang," a ti.
Clay court chungchang sawi chhunzawmin, "Clay-ah chuan ball kal dan hi a danglam deuh bik avangin thaurum a ngai zual a, hlawhtling tur chuan hmasawn bakah inzir belh ka ngai. Chhuanlam siam loa hnehna ka chan theih nan ka inbuatsaih chho dawn," tiin a sawi.