Higuain hnawhchhuah zanah Napoli chak lo

Pathianni zan Italian Serie A inkhelah Gonzalo Higuain-a'n Udinese lakah tun season-a a league goal 30-na khung mah se coach Maurizio Sarri nen an pahniha hnawhchhuah niin Napoli hi khualmualah 3-1 in an chak lo.

Napoli an chak loh avangin league title chawi turin an hna a hautak sawt dawn, Inrinni zanah hmahruaitu Juventus chuan Em­poli 3-1 a an lo hneh tawh si avangin an inthlauhna chu point ruk a ni ta rih a ni.

Stadio Friuli-a inkhelah Bruno Fernandes chuan ṭan aṭanga minute 14-na lekah penalty
aṭangin goal hmahruai a khung a, he goal hi Higuain-a'n minute 24-naah a chhang let.

Amaherawhchu, Udinese hian penalty hmu lehin goal-ah an chantir lo thung a, mahse Fernandes-a'n chawlhlawk hma chiahin an hmahruaina goal khung lehin second half-ah Cyril Thereau chuan an goal thumna a khung bawk.

Argentina international Higuain hi minute 75-naah yel­low card vawi hnih hmuh vanga hnawhchhuah a ni. Kum 28-a upa Higuain hian Udinese defender Felipe dal Belo chu a khak palh zauh niin a lang a, hnawhchhuahna tur awm angin lang lo mah se referee Massimiliano Irrati chuan red card a phawrh.

Hnawhchhuah a nih avangin Napoli striker a lawm lo a, refree Irrati awmah a nem bakah khelmual a chhuahsan pahin a lungawi loh zia nasa takin a lan tir zui a ni.

Napoli manager Sarri chuan, "Udinese khan an khelh ṭhat bakah keini lam khan nidanga kan khelh dan kan phak lo hle. Kan chak loh avangin kan rilru a na in hrehawm ti hle mah ila kan inkhelh hmabak pasarih la awmah chona nasa zawk mi pe ngei ang," tiin a sawi.

Milan khaw club chak lo

AC Milan chu an legend Ce­sare Maldini thih hnua an match hmasa berah an chak lo a, Atalanta tan Alejandro Gomez leh Mauricio Pinilla ten goal khungin Milan tan Luiz Adriano chuan goal khat khung ve mah se 2-1 in an tlawm a ni.

Kum 84 mi nia thi Maldini hian kum 1954 September thla khan Milan tana a match hmasa ber a lo khel tawh a, a season khatnaah hian league title chawi pui nghalin a hnuah Serie A nomawi vawi thum a chawi zui nghe nghe.

Milan hian season thara Cham­pions League khel tur chuan thil mak an thlen tir a ngaih tawh hmel, match 31 khelh tawh aṭangin point 49 an hmu a, table-ah parukna dinhmun luahin pathumna Roma chu point 14 zetin an phak lo tawh a ni.

Inkhel dangah Inter Milan pawhin beisei ang result an hmu bik lo a, Torino chu 2-1 bawkin an hneh lo. Roberto Mancini naute hian point 55 khawl khawm tawhin pangana dinhmun an luah mek.

Roma chak chiang

Nomawi beisei ngam chiah tawh lo mah se Roma-in season tharah Champions League khelh ngei an tum ruh tih an lan tir a, Stephan El Shaarawy, Edin Dze­ko, Alessandro Florenzi leh Diego Perotti te goal khung hmang­in Rome derby-ah Lazio chu 4-1 in an sawp.

Roma hian hmahruaitu Juve chu point 10 zetin thlau rih mah se pathumnaah an insawh nget zel a, palina Fiorentina aiin point sarihin an sang tawh zawk.