ICC World Twenty20 Harsatna karah West Indies an champion

ICC World Twenty20 khelh a nih hmaa West Indies dinhmun chu hlawh avanga player leh board inrem loh a ni a, lungawi lohna avangin West Indies-in T20 World Cup an khel lo teuh hle.

Inelna zawh a nih meuh erawh chuan West Indies-in an hmaa harsatna zawng zawng vaikiangin champion nomawi an chawi a, Pathianni zan khan final-ah England chu wicket lia hnehin World T20-a vawi hnih champion thei hmasa ber an ni.

Inkhel chu

Eden Gardens, Kolkata-ah England an bat hmasa zawk a, over 20-ah run 155 siamin mi pakua an hloh. England tan semifinal-a khel ṭha Jason Roy leh Alex Hales-te hma takah an out a, Hales-a'n run khat chiah a siam laiin Jason Roy phei chuan run siam a nei lo.

Mahse, England tan a dan pangngaiin Joe Root a khel ṭha a, ball 36-a hmachhawnah run 54 vaw chhuaka a tawp thleng damin English batsman zingah run a siam hnem ber. Run 36 siamtu Jos Buttler chuan a khel chhe hran lo bawk.

West Indies bat hun a thleng a, run khat lek siama Johnson Charles a out bakah Super 10-a England an hmachhawn ṭuma run 100 siamtu Chris Gayle chu run li a siam hman awrh tihin a out bawk. Semifinal-a Indian bowler-te tana mangchhia Lendl Simmons chu run siam loin a out bawk a, Windies tan beisei tur a vang.

Mahse Windies tan Marlon Samuels-a inlar a, ball 66 a hmachhawnah run 85 siamin a tawp thleng a dam a, ball 10 lek a hmachhawna run 34 siama a tawp thleng dam Carlos Brathwaite-a'n a pui ṭha takzet bawk. West Indies-in over 19.4-ah run 161 siama mi paruk hlohin hnehna an chang ta a ni.

Over ropui chu

Run 11 lek an siama player pathum lai hloh tawh West Indies hi nomawi chawi turin tuman an beisei lo ang - over khat chauh a awm tawh tiha an run mamawh zat chu run 19 a ni.

Mahse, Windies tana a World Cup hmasa ber kheltu Carlos Brathwaite chuan over 20-naa ball li a hmachhawn hmasak aṭangin six run vawi li a vaw chhuak a, ropui takin West Indies an champion.

Brathwaite hi player pa-ruk an hloh hnuah bat turin khelmual chhungah luhtir ve chauh a ni a, hetihlaia West Indies dinhmun chu 107-6 niin ball 27-ah chak turin run 49 an mamawh.

Kum 27-a upa all-rounder hi final hmain vawi hnih chiah a bat a, South Africa an hmachhawn ṭuma run 10 siamin Afghanistan lakah run 13 a siam bawk. Final a zawh meuh erawh chuan Brath-waite-a chanchinin cricket khawvel titi a luah a, over tawpa ropui taka a team a chak-pui dan hi Windies cricket chanchinah theihnghilh a ni tawh ngai lo ang.

Samuel a ropui

Brathwaite-a chanchin kara sawi hmaih theih loh chu run 85 siamtu Marlon Samuels a ni. Kum 35-a upa batsman run siam zat hi World T20 final-a mimal run siam hnem ber record thar a ni a, Samuels-a record khum hi ama record siam tho a ni! Samuels hian kum 2012 World T20-a an champion ṭumin final-ah run 78 lo siam tawhin a record siam hi amah vekin a khum leh ta a ni.

Eng nge an sawi?

West Indies champion-in titi a luah rualin an ram cricket board leh player-te innghirnghonain titi a luah tel lo thei lo a, Windies player-te huaisenna faktu langsar zingah cricket legend Sachin Tendulkar a tel.

Khawvela batsman piang tawh zinga ropui ber ang hiala an sawi ṭhin Sachin chuan, "Field chhung leh pawn lama chona an hmachhawn zawng zawng hnehtu West Indies hi champion dik tak chu an ni. West Indian Board-te'n an player-te dinhmun hi zirchiangin an harsatna hi an chingfel thuai tur a ni," tiin Windies player-te a fak.

England captain hlui Michael Vaughan chuan, "Darren Sammy i thu­sawi ropui takte avang khan zahna chibai ka buk a che. In ram cricket board-in chak taka hma an lak ka beisei," a ti.

West Indies batsman Marlon Samuels chuan a chungchang thu mawi lo taka sawi ṭhintu Australia spinner Shane Warne kap letin, "Shane Warne hian ka chanchin sawi a bang thei lo a, a hnena sawi ka duh chu hei hi a ni - microphone hmangin ka ṭawng ngai lo, ka bat hian ka sawi tur chu min sawisak ṭhin," tiin run 85-a siam chu Shane Warne tan a nih thu a sawi.

BBC cricket correspondent Jona­than Agnew chuan, "Windies-in hneh­na chang turin six run a zawnin vawi li an vaw chhuak a, khatiang kha ka la hmu ngai lo. West Indies player-te hlim hmel kha hmuh a nuam thlawt a ni. He game ropui tak hian zah leh ṭha taka enkawl a phu a ni," tiin Windies player-te tan a ṭawng chhuak.

England head coach Trevor Bayliss chuan final-ah chak lo mah se hnual mai tur an nih loh thu sawiin, "Dressing room-ah eng anga thu ṭha leh mawi pawh sawi ila ka player-te hi ka hnem zo lo ang. Mahse, hna thawh zawh loh tam tak kan la nei a, chu hna thawk tur chuan player ṭha tak tak kan nei a ni - England cricket hmalam hi a êng takzet a ni," tiin hnual thei an nih loh thu a sawi.