Pathian chungah Darren Sammy-a lawm
World Twenty20-ah beisei loh West Indies an champion a, Windies skipper Darren Sammy chuan ropuina rama hlangkaitu Pathian a theihnghilh lo.
Sammy chuan, "Eng-kim-titheia hnenah lawmthu ka sawi duh a, A tel lo chuan engmah hi tih theih a ni lo. Kan batsman Andre Fletcher hi kan tan chuan pastor a ni a, engtiklai pawhin team tan a ṭawngṭai ṭhin. He team hi ṭawngṭainaa innnghat kan ni a, zanin kan thil tawn hi hriatreng tawh tur a ni," tiin
ṭawngṭaina avanga tun dinhmun thleng an nih thu a sawi.
Kum 32-a upa batsman chuan team chhung buaina chungchang sawi chhunzawmin, "Kan zinkawng a hautak a, he inelnaa inlan lo tur ang hialah ngaih kan ni hman. Buaina tam tak kan nei a, kan board-in min ngaihsak lo a, Mark Nicholas (cricket commentator)-a'n thluak nei lo team tiin min diriam bawk. Mahse, heng harsatna zawng zawngte hian team tan inlungrualna a thlen a, vawiinah kan inlungrualna rah chhuah chu kan hmu a ni. Kan squad pumpui chungah lawmthu ka sawi a, buaina zawng zawng theihnghilha hetianga ropuia khelh hi a harsa a ni," a ti.
Indian Premier League-a Royal Challengers Bangalore tana khel Sammy chuan an coaching staff-te fak chhunzawmin, "Kan coach Phil Simmons hian a hnathawh ropui tak avangin fak a phu a, team manager Rawl Lewis hi sawi hmaih theih a ni lo. Tun hmaa team la kaihruai ngai lo nichungin Lewis hian theihtawp a chhuah a, Dubai-a kan camp a rawn zawm lai chuan jersey pawh kan nei lo. Kolkata-ah kal nghalin jersey pawh kan nei ve thei chauh a ni," tiin an team harsatna a sawi chhuak.
World T20 nomawi an chawi hnuah meuh pawh West Indies-in an ram cricket board aṭangin lawmpuina an dawng lo a, Darren Sammy a lungawi thei ngang lo. Sammy chuan, "Grenada prime minister Keith Mitchell-a'n lawmpuina thu min thawn tawh a, kan ram cricket board aṭang erawhin engmah thawm a la awm lo. Tuna ka tih tur awmchhun erawh heng player leh staff-te nena hlim taka awm phawt mai hi a ni. ODI team-ah thlan tel kan nih loh miau avangin engtikah nge kan khelh ho leh dawn pawh kan hre si lo," tiin an ram cricket board-a politics bawlhhlawh a khak nghal.