Russia-ah entu awm thei dawn

Russia sorkar thuneitu lam chuan an rama Premier League an khelh chhunzawm leh hunah chuan a hmuna entu awm an phal dawn. Russian league hi June thla tawp hmain khelh leh hman beisei a ni.

Ruahman dan hmasa chuan Russian football hi June 21 aṭangin a hmuna entu awm loa khelh tum a ni. Mahse tun hnaiah league thuneitu leh sorkar bakah sumdawnna lama an thawpuite nen an sawikhawm a, stadium chhung 10% chu entu awm hi an remti tlang.

Russian Premier League chuan thuchhuah siamin, "Fans kal tur hi a him leh hlauhawm loh china ngaih a ni, uluk takin endikna kalpui a ni bawk ang," an ti. Russian deputy prime minister Dmitry Chernyshenko chuan a thlawp thu a lo sawi ve bawk.

United States leh Brazil tih lohah chuan Russia hi hri kai tamna hmun a ni. Nimin tlai thleng khan hri kai hmuh chhuah zat hi mi 379,051 an tling tawh.