Kante-a'n training a zawm

N'Golo Kante chuan Chelsea team training a zawm ve ta. Coronavirus a hlauh avangin Kante hi hun rei deuh tak chhung chu in lamah amahin training hi a nei hman a ni.

May 19 khan Kante hi Blues training zawm turin a kal. Mahse, a chhungkhat hnai zingah thawk lama harsatna nei an awm tawh a, amah ngei pawh khelmualah a tlu tawh hial; hri leng hi thawk lama harsatna nei tan a hlauhawm bik avangin Kante pawhin a hlau hi a mak lo.

France international hian mimal training neih a duh chu Blues lam pawhin an remtihsak. Tunah erawh club-ah a kir leh tawh a, a ṭhiante zingah la tel chiah lo mah se manager Frank Lampard tan chanchin lawmawm a ni ang.