Fulham khelmualah mikhual châkawm lo Liverpool

Liverpool damdawi in lun mah se, Jurgen Klopp-a naute result-ah an dam kim lo tih a hriat loh a, German coach-in "Liverpool 2.0" tia an team dinthar leh mek chungchang a sawi kha a thleng dik mek - inelna an telnaah chuan champion an la beisei vek.

Reds hian zanin dar 1:30-ah League Cup semifinal khel turin Fulham an lenchilh dawn a, first leg-ah 2-1 a hnehna an chan tawh avangin inringtawk tak chungin Cottagers khelmual an lenglut ang.

Liverpool laka 2-1 a an tlawm hnu khan Fulham an la insiamṭha lo. Premier League-ah Chelsea lenchilh zuiin, 1-0 in an tlawm a, an fixture hi a hautak ve bawk! Hetihlai hian Reds erawhin 4-0 ngawtin Bournemouth an sawp.

Merseyside club hian goal an khung theih bakah goal venhim an thiam tih an pholang tel a, hei tak hi Fulham tan a hmuhnawm lo ngawt ang. Mahse, football-ah chuan eng pawh a thleng thei tih beisei chungin Reds an mikhual dawn a, an stadium-ah fans puihna nen Liverpool an pet chhuak lo ang tih sawi lawk thei tu nge awm che u?

Liverpool 2.0

Premier League table chung ber luahtu chu Liverpool an ni a, FA Cup-ah fourth round an lut tawh a, Europa League last 16 an lut a, tunah League Cup semifinal second leg an khel dawn - Reds-in inelna an telna apiang an thunun a, an hlim vanglai tak an tawng mek.

Mohamed Salah bakah Thiago Alcantara (khel), Stefan Bajcetic (chawn), Joel Matip (ACL), Ben Doak (khup), Kostas Tsimikas (dar), Trent Alexander-Arnold (khup) leh Andrew Robertson (dar) te chu hliam vangin an chhawr thei lo mek a, Wataru Endo chu Asian Cup khelin a thangbo bawk.

Heti chung hian Liverpool an talbuai lo a, inelna hrang hranga an match hnuhnung pangaah an chak vek - Salah awm loh hlanin Diogo Jota leh Darwin Nunez tan mawhphurhna an la a, Cody Gakpo hmuhnawmna sawi nep theih a ni lo.

Dominik Szoboszlai a dam tawh nia sawi ni mah se fixture a tawt avangin Klopp-a'n Hungarian midfielder hi hahdamtir rih a thlang mai thei a, Szoboszlai tel lo pawh ni se tun hnaia khel hmuhnawm ṭhin tak Alexis Mac Allister hoin, Ryan Gravenberch, Harvey Elliott te an ding ho thei ang - Curtis Jones pawh a la awm.

Fulham beiseina

Anfield-a team pahnih intawn hmasakah Fulham-in goal an khung hmasa zawk a, mahse, Curtis Jones leh Gakpo ngam loin, a tawpah 2-1 in an tlawm - December khan Anfield-ah tho intawngin, Fulham hi 4-3 in an tlawm bawk.

He inkhelah pawh hian rei tak chhung chu 3-2 in hma an hruai a, minute 87 hnua Endo leh Arnold-a goal hmangin Liverpool-in hnehna an chang hram. Fulham chan tawk chu, "A teuh asin aw..." tih chu a ni a, mahni khelmualah chuan an chak thei a ni, tih beisei chungin Reds hi an mikhual ang.

Mahse, Fulham hi an ṭhat dan berin an inlan thei dawn bik lo. Adama Traore chu hliam vangin a chawl mek a, hliam dang nei lo mah se AFCON khelh vangin Alex Iwobi, Calvin Bassey leh Fode Ballo-Toure te chu an chhawr theih loh.

Midfield-ah Liverpool goal nawr na tur dang chat turin Joao Palhinha a awm dawn a, Klopp-a lungdumtu nia sawi midfielder hian German coach hmuh laia chet ṭhat a duh dawn - tawnhriat nei ṭha Willian ngaihthah a thiang lo a, Raúl Jiménez hi hmun awl pek tam chi a ni lo ang.

Thawnthu hlui

September 2007 hnu khan, Premier League club ni chunga Fulham-in anmahni muala League Cup match an khelhin tlawm an la nei ngai lo a, Liverpool mikhual tur team hian he thawnthu hlui keu let chung hian Reds an lo dawngsawng dawn - mikhual laka ṭhat chhuah an tum miah lo ang.

Mahse, ni e, mahse, tih a ngai tlat - Liverpool-in League Cup semifinal an khelh hnuhnung pakuaah first leg-ah hnehna an chang vek a, heng zinga vawi khatah chiah hian second leg-a tlawmin, final an lut lo.

Hei lah a rei tawh - 1997-98 season kha niin, Middlesbrough lakah a ni a, zaninah chuan inringtawk tak chungin Fulham khelmual an leng dawn. Liverpool hian hnehna an chan chuan a vawi 14-nan League Cup final an lut ang!

Final vawi 13 an khelh tawhah vawi kua champion-in, champion ngun ber an ni bawk a, he record hi belhchhah an duh dawn - zaninah an chak chuan Reds player-te a inringtawk lehzual sauh dawn a, hei hi Premier League champion an tumna kawng thlenga pui theitu tur a ni.