Djokovic tan nomawi a hnai zel

Australian Open leh Novak Djokovic te hi chu kawp tura duan an ni a, kuminah pawh an inkawp fuh chho leh hle - Serbian star hian a vawi 11 nana nomawi chawi turin vawi hnih chak a la hmabak.

Nimin khan Rod Laver Arena, Melbourne Park-ah Djokovic hi a inlan a, world number 1 hian a khingpui Taylor Fritz chu darkar thum leh minute 45 chhungin 7-6(3), 4-6, 6-2, 6-3 a hnehin semifinal a lut.

Season khat chhunga Grand Slam hmasa berah hian, kum 2018 hnu lamah Djokovic hian tlawm a la nei lo, a match hnuhnung 33 tehmeuhah hnehna a chang fai vek tihna a ni a, khawih thiang lo ang maiin amah khawih phak an awm lo.

Nizan khan Jannik Sinner leh Andrey Rublev ten quarterfinal an khel chhunzawm a, a chak zawk leh Djokovic ten final luh an inchuh zui leh ang - Sinner emaw Rublev emaw zawk pawh tlang ni se hmachhawn awlsam an ni lo ang.

Grand Slam vawi 24 champion tawh Djokovic chuan, "Break point ka hmuh kha ka chhawr ṭangkai tawk lo hle, vawi 21 aṭanga vawi li chauh a hlawhtlin avangin ka tiṭha tawk lo tihna a ni, chutihrualin a tawpa dingchang zawk ka nei thei erawh a lawmawm.

"Ka hmaah tu nge ding dawn ka la hre lo, ka hriat theih chin chu Melbourne hi ka tan a mawi tawh ṭhin a, kuminah pawh mawi takin a vul leh mek a ni. Tu pawh hmachhawn dawn ila mahni ina khel tur ang mai ka ni dawn a, ka zam lo ang," tiin a sawi.

Vawiin hian mipa singles quarterfinal khelh zawh a ni dawn, chawhma lamah seeded pathumna Daniil Medvedev leh Hubert Hurkacz te an intum ang. Russian tlangval Medvedev hian tun hmain Australian Open final vawi hnih a khel tawh, kuminah champion a tum mek.

Champion tura rinkai zinga mi Carlos Alcaraz leh Alexander Zverev te an inkhel dawn. Spanish tlangval leh German player-te hi theihna nei sang, player hriam leh huaisen an nih avangin an inkhel tur hi a hmuhnawm ang, an hmaa inkhelte rei dan a zirin zan lamah an inkhelh a rinawm.