Aizawl FC head coach thar Stojkoski Bobi

I League club Aizawl FC chuan head coach atan Stojkoski Bobi an la lut a, NorthEast aṭanga I League champion thei awmchhun club enkawltu tur Bobi hian January 22, Thawhṭanni khan Aizawl a rawn thleng.

Kum 58 mi Bobi hian tukin zing aṭangin training a zawm tura ngaih a ni a, Aizawl FC dinhmun ṭha taka dahtu coach B. Malsawmzuala'n a pui ang. Bobi hi North Macedonia khawpui Skopje-a piang a ni a, UEFA Pro Licence nei niin Australia club Kadina FC leh North Macedonia club Korabi Debar FC te a lo enkawl tawh a ni.

Aizawl FC hian season ṭantirh khan Dutch coach Erol Akbay hoin bul an ṭan a, Mohammedan SC an hneh loh zawhah club nen an inṭhaṭhen. Hemi hnu hian assistant coach B. Malsawmzuala'n mawphurhna a chelh chho a, result pawh an nei ṭha hle.

Luangmual pa Sawmtea hnuaiah hian Aizawl FC-in match 10 khelin vawi nga an chak a, vawi li inhnehtawkin point 19 an hmu. Mizo club hi table-ah palinaah an awm mek a, match 13 khelh tur a la awm avangin champion thleng pawha la beisei ngam a ni.

Aizawl FC hian second phase-ah result ṭha beiseiin Bobi an lakluh hma hian Polish midfielder Rafal Zaborowski leh Iranian forward Amir Memari te an la lut tawh bawk. Club president Robert Romawia Royte chuan, "I League-a Aizawl FC a tel ve reng thei hi Pathian malsawmna a ni a; coaching staff, player te leh club management te an fakawm. AFC fan-te leh Mizo mipuite support-na a hlu em em a, kan khelh hmabakah pawh nasa taka min ṭawiawm ka beisei," tiin a sawi.

Mizo club hian February 10, Inrinni zan dar 7:00 hian Mohammedan SC an mikhual dawn a, Kolkata club hi tun season ṭantirha an hneh loh an nih avangin Aizawl FC hian Mizo mipui ṭawiawmna an mamawh khawp ang.