Super Cup semifinal-ah Odisha

Thawhṭanni zan khan Indian Super Cup inkhel hmuhnawmah Odisha FC chuan 3-2 in FC Goa an hneh a, semifinal an lut - Indian Super League club pahnih hian an intawn hmain match hnih an khelhah hnehna an chang ve ve a, Kalinga Stadium-a an inkhel tur pawh hi boruak a lian hle.

First half-ah goal a lut lo a, second half-ah Odisha hian goal thum an rawn khung - Ahmed Jahouh chuan minute 51-naah goal hmahruai khungin, Mourtada Fall chuan minute 61-na leh 66-naah a rawn khung ve bawk.

Odisha hi harsatna nei loin an chak mai dawn niin a lang hman a, mahse, Carlos Martínez chuan FC Goa tan goal hnih rawn khung ve lehin Odisha thinphu a tirang hman - goal dang erawh an nei zui thei lo a, 3-2 in Odisha an chak.

Mizo player pakua kawltu Odisha tan keeper Lalthuammawia Ralte, defender Jerry Lalrinzuala, midfielder K. Lalṭhathanga leh Isak Vanlalruatfela ten bul an ṭan a, hun pek belhah Jerry Mawihmingthanga chu bench aṭangin a lut bawk.

FC Goa-in Mizoram player pakhat Ayush Chhetri an kawl a, Dinthar tlangval hi minute 81-naah luhtir niin, a team erawh a chakpui zo bik ta lo.

Super Cup semifinal hi zaninah khelh ṭan a ni nghal dawn a, Jamshedpur FC leh East Bengal an intawng dawn - Men of Steel boss Khalid Jamil-a'n Aizawl FC aṭanga Indian coach hlawh hnem ber ni tura lo sawm chhuak tawhtu East Bengal lakah hnehna chan a tum ang.