Qatar an chak vek, zaninah Japan fiahna

Asian Cup 2023-ah inelna thlengtu Qatar-in group match-ah an khingpui an hneh vek. January 22, Thawhṭanni zan khan Qatar hian China 1-0 in an hneh a, group A inkhel dangah Tajikistan-in knockout stage lut turin Lebanon 2-1 in an hneh ve bawk.

Vawiin tlai dar 5:00 hian group D match hnuhnung ber khelh a ni dawn. Hmahruaitu Iraq leh table mawngphaha awm Vietnam an inkhel ang a, Japan leh Indonesia ten point thum ve ve hmuin pahnihna nih an inchuh ang. Asian Cup-ah hian group paruka pathumna zinga tiṭha paliin last 16 an luh dawn avangin Samurai Blue hi chak lo mah se knockout stage luhna kawng a la inhawng tho.

Qatar an insiamṭha

Qatar-in FIFA World Cup 2022 an thleng a, group match-ah Netherlands, Senegal leh Ecuador nen awm hoin match thumah an chak lo vek. Asian Cup 2023 pawh hi Qatar-ah nghah a ni a, tun ṭumah erawh Qatar-in khawtual mipui tan lawmna an siam ta. Qatar hian an khingpui hneh vekin knockout stage an lut.

Tintín Márquez kaihhruai Qatar hian Lebanon 3-0 a an sawp hnuah Tajikistan 1-0 in an hneh a, match hnih lekah knockout stage an lut tawh. Hei vang hian China nen an inkhelh ṭum hian player an insiksawi thei a, an team ṭha ber an lut lo.

Khalifa International Stadium-ah China-in inkhel an thunun a, knockout stage lut tura point thum an mamawh avangin an nawr na viau bawk. Mahse, China-in an goal khung theih loh an tuar a, Qatar tan substitute Hassan Al-Haydos-a'n a luh aṭanga minute hnihna lekah chakna goal a khung. Kum 33 mi Al Haydos hi Qatar tana khel tam ber a ni a, vawi 178 zet ram tan a khel tawh a ni.

Qatar-in hnehna an chan avangin Lebanon tan knockout stage luhna kawng a inhawng a, Bassel Jradi hmangin Tajikistan lakah minute 47-naah hma an hruai. Heti hian inkhel tawp se, Lebanon hian last 16 an lut ang. Mahse, Tajikistan-in minute 80-naah Parvizdzhon Umarbayev hmangin si phurh an sut a, injury time-ah Nuriddin Khamrokulov-a'n chakna goal a khung.

Qatar hnung zuiin Tajikistan an tling a, Lebanon an tla. China hi pathumnaah an awm avangin last 16 kawng a la inhawng a, amaherawhchu point hnih chauh an hmuh avangin inkhel dang result-ah an la innghat.

Japan fiahna

Group D aṭangin Iraq-in last 16 an lut tawh a, an khingpui tur Vietnam erawh an tla tawh thung. Asian Cup-ah hian head to head ngaih pawimawh a nih avangin Vietnam hian point thum pawh hmu se, an chunga awm Japan leh Indonesia te hi an hneh loh ve ve avangin beisei tur an nei tawh lo.

Al Thumama Stadium, Doha-a Japan leh Indonesia inkhel tur erawh en a châkawm. Kum 1989 kha team pahnih inhmachhawn hnuhnung ber a ni a, 1990 FIFA World Cup qualifier-ah inkhelin Japan hi 5-0 zetin an chak.

Tun ṭumah hian Japan hi rinkai la ni zawk tho mah se an sawp a rinawm tawh lo a, Indonesia hian point an hmuh hrim hrim chuan an tling dawn tih an hriat chian avangin attack kher an tum a rinawm lo. Chutihrualin Hajime Moriyasu enkawl Japan erawh FIFA World Cup-a Germany meuh titla thei an ni a, attacking football an khelh ngei a rinawm.

Japan team-a player langsar chu goalkeeper Zion Suzuki hi a ni a, a pa hi Ghanaian American a nih avangin a vun rawng a dum a, a nu erawh Japanese a ni thung. Kum 21 mi Suzuki hi nipui bazarah pawh khan Manchester United nen an sawizawm a, amaherawhchu back up goalkeeper nih a duh lo.

Blue Samurai hian World Cup-a an star player Takuma Asano, Takumi Minamino, Takefusa Kubo, Junya Ito, Ritsu Doan leh Daizen Maeda te an la kawl vek. Chutihrualin captain Wataru Endo hi Liverpool tan a khelh tawh avangin Premier League ngaina Mizote en chik tur a ni. Endo hian Iraq an hneh loh ṭumin goal a khung nghe nghe.

Japan hian Indonesia lakah champion beisei ngam team an nihzia lantir an tum dawn a, Al Thumama Stadium-ah Hajime Moriyasu hote fiahin an awm ang.