Silly Point: Hello 2024

Kumthar kan chuangkai a, infiamna khawvel erawh masi vuakvet lai aṭangin full speed-in a tlan muah muah mai a, cricket lamah ICC World Cup chu kumhlui kumtawp lam khan kan thlah liam chiah emaw kan tih laiin, kumin kum laihawla USA-in a thlen tur ICC T20 World Cup lam hi nghahlelh awm tak a ni nghal der mai.

Zofate rahbi

Kum 2018 aṭanga BCCI huang chhunga kan luh aṭangin Cricket Asst of Mizoram chu season ruk laia upa a lo ni ve ta der mai a. Nimin lawk emaw kan tih chhungin, hemi chhung ringawt pawh hian thlasik vawi ruk lai a lo liam ve dawn ta reng mai.

Age group leh hmeichhe lamah champion han tih tur thawm chu la awm lo mahse, hma kan sawn tih hai rual a ni lo a. A bikin mipa under 16 te hnuhma a ngaihnawm. Team anga han champion meuh tur chuan chhuan khat te a la liam leh chu a ngai ngei ang. Amaherawhchu kan rawltharten coaching leh foundation dika bul an ṭan chuan, hnamdang ho thlen chin hi an thleng thei a ni tih an rilru ah a intuh nghet tlat tawh a, century siam te, wicket 5 la inkhel tin deuh thawa kan han nei chho ta te hi, ngaiah kan nei chho ṭan ta der mai. Hmeichhe cricket lah hma a sawn tih chu mi â ni leng lo tan chuan hai rual a ni lo.

Damdawi kha mi

A tehfung ber leh patla ber erawh a professional ber Senior Mipa 1st Class Cricket hi a ni lo thei lo a. Tun season 2/3 chho chu elite division ho nen T20 leh 50 overs lamah huang khat a khung an nih hi an vanduai kan tithei ang. ChutiHrual chuan inzirna atan leh tawnhriat atan chuan duhthusam a ni lawi si. Khawvelah hian chhe ber leh ṭha ber awm theih ni hek suh, fuh lo anga lang te hi, a thlirna tlang dang aṭang chuan thil fuh ber a lo ni ve lawi si ṭhin.

Ranji Trophy-a an khawsak dan hian hma kan sawn leh sawn loh a hril thui ber ang. Vawi khat mah chung zawk dinhmuna kan la awm ngai lohna ṭhenawm Nagaland lakah draw chunga point hmu hnem zawka an ṭang leh Arunachal Pradesh an han hneh te kha, hmasawnna chu a ni. Beisei a sang ṭan viau.

2023- 24 season hi Plate Group team ruk inelnaa top 3-a an khar theih chuan, champion tluka ropuiah ka chhal ang. Chumi tur chuan inkhel 2 an la neih, team hrawl pahnih Meghalaya leh Hyderabad laka an inkhel dan hian thui tak a hril ngei dawn a ni. Amaherawhchu team lam boruak leh player-te thu inhmu lo leh khi awm anga thuthang, keini beng meuh rawn thleng ṭhin hi, thutak a nih chuan, administration leh management lamte an professionalism an tihlan hun ngaih lai tak a ni ve thung.

Local Cricket

Mizoram pawn lam chu remchang zawkah a aia thui leh chipchiara ziah kan tum ang. Local Cricket pawh a kal ve zel a. Kan Suaka Cricket Ground Pitch ber mai hi changkan lam a pan thei lo hian kan local cricket hma sawntir thei lotu pakhat a ni.

CAM lam vice president Dr Joel Lalnghakliana Pautu erawh titina lamah an hmathlir leh hmachhawpte a ngaihnawm ka ti a, an term chhung ngeia inkhelhna tur khelmual dang sual chhuah leh an tum thute hi , keini tan chuan thu lawmawm a va tling si em.

General secretary P Lalremruata hun rei lote chhungin a phak ang tawk tawkin hma an lakna hnuhma hmuh tur a awm nghal a. Thil zawng zawng hi full speed-a kal thei a ni bik lo tih erawh a hrechiangtu zinga miah ka inchhal a. An tumna leh chezia thlirin, Sorkar thar - Kalphung Thar kan tihte nen pawn a inthlumzawm ṭan viau e tiin, ka ṭhuthmunah mang ram nen ka lo thlir ve nasa ṭhin.

Engpawhnise, kumthar chibai, hmalam i pan tlang zel ang aw.