Salah dinhmun a ṭha lo

Liverpool chuan Africa Cup of Nations-a Mohamed Salah hliam chu an rin aia a nat thu an sawi a, hetihlai hian Egypt chuan semifinal an thleng thei a nih chuan Salah hi chhawr hman an inbeisei thung - semifinal hi February 7-ah khelh a ni dawn.

Egypt hian Thawhṭanni zan khan Cape Verde chu 2-2 a inhnehtawkpuiin, AFCON round of 16 an lut a, Liverpool chuan kum 31 mi an forward hi Nilainiah an hnenah inenkawl tura a kir tur thu an sawi.

Liverpool chuan, "A tira kan rin dan aiin Salah hliam hi a lo na a, club leh ram tana a lo kir leh thuai theih nan theihtawp chhuahin hma kan la ang a, AFCON a khelh leh theih ngei kan duh pui a ni," an ti.

Reds manager Jurgen Klopp chuan Salah an hruai kir tur thu chian hma khan, "Kan hnenah a inenkawl hi a ṭha ber a, Egypt hian final thleng ta se, final khel turin a kal thei ang," a ti.

Hetihlai hian Salah-a agent Ramy Abbas Issa chuan AFCON hrim hrimah Salah inlan zui a beisei lo. Ramy Abbas chuan, "Mohammed-a hliam hi a tira kan rin ang aiin a na a, match hnih lek ni loin, ni 21-28 inkar vel chu a chawlh a ngaih ka ring," a ti.

Salah-a agent chuan sawi zawmin, "AFCON khelh meka a inlan leh theihna chance san theihna ber chu, UK-a a ṭha thei ang bera a inenkawl phawt hi a ni," a ti a, Salah dinhmun a ṭha lo.

Ramy Abbas-a sawi ang hian Salah hi chawl ta se, a hliam neih aṭanga ni 21-naah dam ta se, AFCON final hma ni thumnaah a dam dawn chauh tihna a ni a, final lut ta pawh ni se, a khel thei kher ang em, tih chu zawhna chhan harsa tak a ni.

Salah hian Liverpool-ah season ruk hun a hman chhungin hliam vangin league match 10 chiah khelh loh a nei a, hei vang hian Klopp chuan a hliam tirh khan Salah meuh a khelh chhunzawm thei lo a nih chuan a hliam chu a na hle a nih a rin thu a lo sawi tawh.

Egypt hi AFCON-ah vawi sarih an champion tawh a, mahse, an champion hnuhnung ber hi 2010 ni tawhin, hetihlai hian ram tan Salah a la inlan lo. Kum 2017 leh 2021 khan final lut mah se an chak zo lo a, Salah erawhin a la champion ngei a beisei.

Tun season-a Reds tana goal 18 khung tawh Salah chuan, "AFCON champion nih hi ka châk a, engtin emaw tak chuan a la thlen ka beisei. Chu chu ka rin dan a ni a, ka rin tawh hi chu a hlawhtling zel a ni.

"Ka hmaa nomawi inchhawp chu ka chawi zel a, mahse, AFCON ber hi ka la thei tlat lo. Player-te tana AFCON hlutzia chu kan hre vek a ni," a ti a, champion a châk hle.