Semifinal-ah Gauff a lut

Coco Gauff chuan nimin khan Marta Kostyuk hnehin Australian Open semifinal a lut a, Grand Slam nomawi pahnihna chawi tuma a beihna lamah kawng dik a la zawh mek zel.

Rod Laver Arena, Melbourne Park-a inkhelah Gauff hian tihsual a ngah, ama tihsual vanga a khingpuiin point a hmuh (unforced errors) hi vawi 51 a tling a, mahse winners vawi 17 vaw chhuak ve thungin 7-6 (8-6), 6-7 (4-7), 6-2 in a chak hram.

Set khatna bikah Gauff hi 5-1 ngawtin a hniam hman, mahse huaisen takin a bei let thei. Nimin tlai khan Aryna Sabalenka chuan straight set hmangin Barbora Krejcikova a hneh a, semifinal-ah Gauff hi an hmachhawn leh dawn.

US Open champion lai Gauff chuan, "Zep tur a awm lo, ka khel ṭha lo takzet a ni. Ka khelh ṭhat loh chhan kha Marta Kostyuk a khelh ṭhat vang a ni bawk. Final lut tur chuan tun aia ṭha khan ka khelh a ngai," a ti.