Napoli hnehin Inter an champion

Hun tawp dawna Lautaro Martinez-a goal hmangin Inter Milan chuan Napoli 1-0 in an hneh a, tun season an nomawi hmasa atan Italian Super Cup an la.

Italian team ṭha pahnih an inkhel tawk a, an inveng thiam hle bawk. Goal kan hmu dawn lo emaw tih hnuah, defender Benjamin Pavard-a ball pek dawngtu Martinez chuan chakna goal awmchhun atan a khung.

Kum 26 mi Martinez hian tun season kal laia inelna hrang hrangah goal 21 a khung tawh a, a team Inter hi nomawi dang chawipui turin dinhmun ṭhaah a dah mek bawk - a tan season duhawm a ni mek.

Serie A champion lai Napoli tan erawh season harsa a ni chhunzawm. Inter lakah Giovanni Simeone chuan yellow card vawi hnih a hmuh avangin minute 60-naah hnawhchhuah a ni a, an tan thawhchhuah a harsa.

Italian Super Cup hi kumin aṭangin a khelh dan an tidanglam. Season hmasa lama Serie A champion leh pahnihna te bakah Coppa Italia champion leh finalist te khan Super Cup hi an khel.

Inter Milan coach Simone Inzaghi chuan, "Napoli khan fak an phu hle, goal an ven thiam bakah sakeibaknei ang maiin an hlauhawm a, hun tawp dawna goal chhuah vanga an chak lo kha a hrehawm khawp ang tih ka hrethiam.

"Chutihrualin ka naute khan champion phu khawpin an khel ṭha a, semifinal leh final kan khelh inkarah khan darkar 60 vel chauh a awm a, a nihna takah chuan hahdamna hun kan nei lo," a ti.

Inzaghi hian Italian Super Cup hi vawi nga a chawi tawh a, tun hmain Lazio a lo hlawhtlinpui tawh bawk. Inelna bikah hian record nei ṭha ber niin, vawi li champion Marcello Lippi leh Fabio Capello te a khum.

Napoli manager Walter Mazzarri chu a player hnawhchhuah a nih danah leh, referee Antonio Rapuano thutlukna ṭhenkhat vangin a lungawi lo a, lawmman semna hunah pawh a awm ve duh lo.

Tun hmain Beijing khawpuia Napoli leh Juventus an inkhelh ṭum pawhin Mazzarri hi a lo lungawi lo tawh a, hemi ṭum pawh hian an chak loh dana a lawm loh vangin Juve lamin lawmman an dawng lai chu a awmpui ve duh lo bawk a ni.