Matthaus-a'n Bayern player lak dan a sawisel
Bundesliga-ah Bayern Munich chu Bayer Leverkusen hnuaiah an awm mek a, captain hlui Lothar Matthaus-a'n transfer-a club chet dan a sawisel. Matthaus hian English defender Eric Dier an la chu mak a ti a, Bayern nena sawizawm mek Kieran Trippier an mamawhna a hre lo bawk.
Kum 62 mi Matthaus chuan, "Bayern Munich ka hriat dan an ni lo. Bayern chuan player naupang zawk, mual sir emaw a laia zalen taka che thei an la tur a ni. Kum naupang ṭha chu an nei ngei a, Aleksandar Pavlovic te hi entirna an ni thei ang. Sporting director Christoph Freund-a'n hna ṭha tak a thawk.
"Nipui khan Pavard leh Stanisic te chhuahtirin a thlakna tur kan neih theih mai kan ring. Mahse, mual sira khel thei an la ta si lo a, right back-ah harsatna kan tawk ta chiah. An insiamrem theih an inring a, mah se an thei lo tih an hre tlai," tiin a club hlui a sawisel.
Bayer Leverkusen nen khaikhin zuiin Matthaus chuan, "Leverkusen-ah chuan Xabi Alonso-a'n a duh tak player kha nipui aṭangin a kawl tawh a, kar ruk chhung a hrual thei," tiin a sawi.
Bayern player lak dan sawi zelin Matthaus chuan, "Hoffenheim nen an inkhelh ṭumin squad tihchhah an mamawh an tia, Bremen lakah pawh an la mamawh tho. Asian Cup khela zin Kim Min-Jae awm loh chu an tuar ngei mai. Mahse, Leverkusen-in AFCON vangin player an chân hnem zawk. Player hian inlak ṭhat an mamawh a, tuna an player lak hi kan ṭhatpui em? Eric Dier hi Tottenham-ah player pawimawh a ni tawh lo.
"Uli Hoeness-a thusawi kha ka la hre reng. 'Club danga bench-a ṭhu player hi kan lak belh dawn tawh lo,' a ti. Mahse, kan player lak hi en ula, a sawi ang chu a ni chiah lo," tiin Dier chungchang a sawi.
Bayern-in match hnuhnung bera Werder Bremen 3-0 a an hneh loh ṭum khan Eric Dier hi bench-ah a ṭhu tluan. Kim Min-jae awm lo mah se Dayot Upamecano leh Matthijs de Ligt te an la nei tho tih erawh hriat a ṭha.
Zanin dar 1:00 hian Bayern-in Allianz Arena-ah Union Berlin an mikhual dawn a, Bayer Leverkusen nen an inkar tizim turin Thomas Tuchel-a hoten chak an mamawh.