Goal khung ṭhulh lo Morata

Atletico Madrid tan Álvaro Morata chuan goal a khung chhunzawm zel a, Thawhṭanni zan khan Atletico Madrid tan goal khung lehin, Spanish club hi Granada lakah 1-0 in hnehna a chanpui - La Liga table-ah palina dinhmun luah zuiin, champion beisei a la bo bik lo.

Morata hian tun season inelna hrang hrangah match 28 khelin goal 19 ngawt a khung tawh a, assist vawi thum a nei bawk - season khata goal a khung hnem ber ṭuma goal 20 a khung chu tun season-ah hian a khum ngei dawn niin a lang.

Kum 31 mi striker goal khung hi a tirah referee-in offside vangin pawm lo zet mah se, video assistant referee a rawn hnuah goal atan a pawm a, Saul Niguez goal khung chu offside vangin a pawm lo tlang thung.

Hetihlai hian penalty box-a Atletico defender José María Giménez-a handball ni ngeia lang chu referee-in handball a ham lo a, VAR-in a ngaihdan a sawhsawn lo - hei vang hian Granada an lawm lo hle.

Mahse, Atletico boss Diego Simeone chuan, "Handball leh Saul-a goal pawm loh kha ennawn theih tak chu a ni a, mahse, football-ah chuan hetiang thil hi a thleng ve fo ṭhin alawm. Kei chu VAR rin tlat duh mi ka ni a, he game tana VAR hnathawh ṭhat hi a tam tlat a ni.

"Beisei anga VAR-in hna a thawh loh chang chu a awm ngei a, mahse, a tam zawkah chuan a dikin ka hria," a ti a, VAR a thlawp tlat - Granada lakah hian Atletico forward Antoine Griezmann chuan post a pet per a, substitute Angel Correa chuan hnai set sawt aṭangin a hlah bawk.

Copa del Rey round of 16 aṭanga Real petchhuaktu Atletico hi Ningani zanah Spanish Cup quarterfinal khel tur hian an inlan zui dawn a, tun season-a team talbuai tak Sevilla an mikhual ang.