Salah tel loin Egypt an tlang

Africa Cup of Nations 2023 khelh laiah Mohamed Salah chhawr thei rih lo mah se Egypt-in last 16 an inhlangkai, group B match vawi thum an khelh tawhah chak ni hmel hmu miah lo mah se an point thum hmuh chu knockout stage luh nan a tawk.

Thawhṭanni zan inkhelah Egypt hi Cape Verde nen 2-2 in an inhnehtawk, match thum an khelh hoah an khingpuite nen an inhnehtawk vek a, pathumna ni thei dinhmunah an ding hman.

Mahse, Group B inkhel dangah Ghana leh Mozambique te 2-2 in an lo inhnehtawk ve bawk a, an result avangin Egypt hi pahnihna an nih theih phah a, pathumna Ghana chuan group dang point neih dan a zirin beisei an la nei ve bawk.

Tlang mah se Egypt hian an player pawimawh Salah erawh an la chhawr thei dawn lo. Salah hi a malpui hliam vangin a chawl mek a, a khelhna club Liverpool chuan an player hi an rin aia a hliam nat thu an sawi.

Egypt lam chuan an chak chho zel a nih phawt chuan Salah hi a theih hun huna chhawr an duh, amah pawhin ram tana khelh a hreh lo - Reds lam pawhin a dam hman a nih chuan a feh chhuah an remtih thu an sawi ve bawk.

Inkhel dangah Ghana chuan hun tawp dawnah goal hnih an chhuah. Jordan Ayew-a penalty pahnih khung hmangin hma an hruai a, an dinhmun pawh a ṭha hman - mahse minute 90 pelh hunah Geny Catamo leh Reinildo Mandava ten an sut.

Group A aṭangin Equatorial Guinea leh Nigeria te an tling a, a thlengtu Ivory Coast erawh dinhmun derthawng takah an awm thung. Inkhel pawimawhah Ivory Coast hi Equatorial Guinea lakah 4-0 in an tlawm.

Equatorial Guinea tan erawh hun nuam a ni thung - AFCON bikah hian 2015 khan semifinal an thlen baka sang an la thleng lo. Kuminah beisei phak baka ṭhain hun an hmang a, tunah chuan Group C, D, E khawi emaw ber aṭanga pathumna tum turin an lo nghak ta.

Guinea bakah hian Nigeria chu Group A aṭangin an tlang. Nigeria hian tlang turin vanneihna an mamawh ve bawk, Opa Sangante-a'n anmahni lama a tihluh hmangin Guinea-Bissau 1-0 in an hneh hram a, point sarih neiin an tlang ta a ni.