Barca-in Araujo chhuah phal lo

Tun hnaiah Barcelona defender Ronald Araujo chu chhuak tur anga sawi thawm awm mahse, Barcelona sporting director Deco chuan Araujo chu an defender pawimawh a nih thu sawiin, an chhuahtir dawn loh thu a sawi.

Deco chuan, "Araújo hi kan club hma hun leh tun hun atan pawha player pawimawh a ni a, he hmuna cham zel tura contract a neih bawk avangin hralh tumna kan nei lo. A pawimawh ber chu he hmuna hlawhtlin duhna thinlung nena an awm a, an hlim hi a ni," a ti.

Kum 24 mi Araújo hi centre back niin, right back-ah pawh a chhawr theih a, August 2018 khan Uruguayan top division club Boston Rivers aṭangin Barca hi a pan a, a tirah B team tan khel mah se, kum 2019 aṭangin senior team tan a inlan ṭan.

Xavi hnuaiah hmun pawimawh chang chhoin, tun season-ah ringawt pawh match 21 a inlan tawh a, 2021-22 season khan La Liga team of the season-ah a lang phak hial. European club langsar Manchester United leh Bayern Munich-in an rim nia sawi a ni a, mahse, Deco-a'n hralh an tum loh thu a tichiang.

Barca hian naktuk zing lam dar 2:00-ah Athletic Bilbao nen Copa del Rey quarterfinal an khel dawn a, Xavi-a'n, "Nomawi beisei tur pathum kan la nei," tia Spanish Super Cup final-a an chak loh hnua a sawi anga sawi zel theih a duh ang.

La Liga-ah Barca hian hmahruaitu Girona chu point riatin an phak lo mek a, match khatin an khel tlem thung. Champions League round of 16 an lut tawh bawk.