Hans-Dieter Flick, Bayern

Bayern Munich manager Hans-Dieter Flick hi February 24, 1965 khan Heidelberg, West Germany-ah a piang. Team tana thawk ṭhin midfielder a ni a, Sandhausen tana bul ṭanin kum 20 a nihin Bayern Munich-ah contract a ziak.

Bavarians tan hian match 100 a khel tling a, hemi hnu hian FC Cologne-ah kalin inhliam vangin kum 28 mi lek a nihin football khelh a chawlhsan. Flick hian club tenau Viktoria Bammental-ah kum 1996 khan player-manager hna a thawk a, hetihlai hian kum 31 mi chauh a la ni.

Kum 2000-ah Hoffenheim a enkawl ṭan a, amaherawchu Hoffenheim hi fourth division-ah an la awm. Kum 2006 khan Salzburg-ah hun rei lote chhung Giovanni Trapattoni hnuaiah hnuaiah a awm a, kum 2006 nipuiah Joachim Low hnuaia awm turin Germany national team-ah assistant coach hna a chelh. 

Die Mannschaft-in World Cup 2014 an champion te, Euro 2008 semifinal an luh leh World Cup 2014-a pathumna an nihte khan Flick hian assistant coach hna a chelh. World Cup nomawi chawi zawhah Germany tan sporting director hna a chelh a, January 2017-ah Hoffenheim CEO hna hun rei lote chhung a chelh.

Tun season ṭantirh khan Niko Kovac-a'n coaching staff zingah a lalut a, November 3-a Croatian manager an ban tak hnu khan Bavarians enkawl hna a ṭan. Flick-a hnuaiah Bayern-in nasa takin hma an sawn a, league thunun chunga Bundesliga an champion bakah DFB-Pokal-ah nomawi an chawi leh bawk.

German chanchinbu Bild chuan a hnathawh hriain manager of the year award an hlan a, Champions League nomawi a chawi chuan chawimawina tam zawk a la dawng thei ang.