British Grand Prix awm dawn lo

MotoGP British Grand Prix 2020 chu coronavirus vangin neih theih a ni dawn lo, intlansiakna buatsaihtu lam chuan nimin khan inelna an ṭhulh thu hi an tichiang.

Bike intlansiakna sang ber hi ruahman dan chuan August 28-30 khian Silverstone tlan kawngah neih tur a ni. Beiseina nen nghak viau mah se hri leng a reh mai loh avangin 

ṭhulh a ngai.

MotoGP hi season an la ṭan thei lo a, tuna an ṭhulh tak British GP nena chhiar chuan intlansiak panga ngawt mai an ṭhulh fel tawh. July 19 hian Spain ramah inelna hmasa ber chu tlan theih an la beisei zel.

Silverstone managing director Stuart Pringle chuan, "Thla khat chuang zet chu inelna hi him taka neih a nih theih nan hma kan la, a hmuna entu awm loa tlan thlengin kan ruahman hman hial.

Amaherawhchu thil thleng thei hrang hrang kan ngaihtuah kual hnuah intlansiak neih loh chu hri laka kan him tlan theihna tur ṭha ber a ni. Keini chuan rider, team tana hnathawk leh mipui himna leh hriselna chu kan ngaih pawimawh ber a ni," tiin a sawi.

MotoGP-ah chuan British GP hi inelna ngaihhlut leh hlun tak a ni a, kumina a awm lo tur hi channa lian tak a tling. Season hmasa khan Silverstone tlan kawngah hian Alex Rins chuan hnehna a chang.