Real Sociedad tana khel tur Silva

Manchester City playmaker hlui David Silva chuan Lazio a pan dawn emaw tih laiin Real Sociedad zawk a zawm a, an ram Spain club tan hian season hnih khel turin contract a ziak. 

Kum 34 mi Silva hi Lazio chuan kum thum chhung atan contract an zawrh a, mahse a career tawp lam hmang ve tawh player hian Spain lama kir a thlang ta zawk a ni. Sociedad hian season hman zawh takah khan La Liga-ah parukna dinhmun an luah a, Real Madrid aṭanga loan hmanga an hawh Martin Odegaard chu Santiago Bernabeu-ah a kir a, a hmun ruak luah turin Silva hi an lalut. 

Spain tan vawi 125 inlana goal 35 khungtu Silva hian kum 2010 khan a hming chherna Valencia aṭangin City a zawm a, inelna hrang hrangah match 436 khela goal 77 khungin assist vawi 140 zet a nei!

City tana Premier League (4), FA Cup (2), League Cup (5) leh FA Community Shield (3) nomawi chawitu hi City chuan  Etihad Stadium-ah a lim an din tur thu an sawi a, training ground pakhat chu a hming an puttir ang a, a lem an pholang bawk ang.