Vawiin tlai dar 4:30-ah Goan champion Vs MPL champion

Aizawl FC tan I League in-hamtang turin Goa-ah Sporting Clube de Goa hneh a ṭul a, Rajiv Gandhi Stadium-ah MPL champion hi Goan champion laka an tlawm tawh avangin Mizo club hmabak hi a khirh khan hle.

Inkhelh hun hi tlai dar 4:30 a ni a, inkhelhna hmun hi Fatorda Stadium a ni. Goa-ah hian Aizawl FC-in January thla khan Salgaocar chu injury time-a R. Malsawmtluanga penalty hmangin an draw tawh a, tun ṭum-ah pawh hian a chhe berah point khat an hlawhchhuah a ṭul ang.

Odafa a inhliam

Sporting Goa-in Aizawl an rawn tlawh ṭumin an striker chhuanvawr Odafa Okalie chu Mizo defender hmaah a thamral a, coach Mateus Costa-a'n chhuanlam siam lo mah se Shillong Lajong coach Thangboi Singto-a'n a chhan thung.

RG Stadium-a Lajong leh Aizawl FC inkhelh zawhah Thangboi chuan, "Shillong-ah Odafa nen kan inbia a, boruak balh vang lam ni loin Aizawl awmna hmun a san avangin a thawk
ṭhat theih loh thu min hrilh," tiin Nigerian striker chetṭhat loh chhan a sawifiah chiang hle.

Goa-ah erawh Odafa hian record a nei ṭha a, Goa Pro-fes-sional League-ah goal 11 khungin top scorer a ni a, Sporting Goa a champion pui bawk. Tun season I League-ah Odafa hian goal 6 a khung tawh a, Aizawl FC an hmachhawn ṭumah erawh in-hliam vangin a inlan thei dawn lo.

Aizawl FC coach Jahar Das chuan, "Odafa khel thei lo tur hi kan tan chuan thu lawmawm a ni. Amah hi player pahnih ang maia
ṭha a ni a, tunah chuan 11 leh 11 in kan inkhel thei ang," tiin Nigerian striker awm lo chu rilru lam thlenga a nghawng tur thu a sawi.

An inhmu chhuak

Aizawl FC-in champion lai Mohun Bagan an hneh zawh-ah Shillong Lajong lakah an mualpho a, 1-3 in an chak lo. Bengali coach Jahar Das chuan, "Mohun Bagan kan hneh zawh khan Lajong lakah goal kan khung hma si a, khung belh leh tumin nawr chiam kan tum a, kan tih loh tur kan ti a ni. Sporting Goa lakah hian point thum kan mamawh a, chumi mil chuan khelh kan tum. Amaherawhchu chak loh pawi zia kan hria a, kan tlarhnung lam kan ngaihthah lo ang," tiin Vanglaini palai a hrilh.

Aizawl FC coach Jahar Das chuan player inhliam an neih loh thu a sawi tel a, Sporting Goa an hneh theih a beisei viau bawk.

A awlsam dawn lo

January 25, 2016 RG Sta-dium-a an inkhelh hmasak
ṭumin second 16 leka Nicholas Fernandes-a goal leh halfway line pel hret aṭanga Loveday Okechukwu goal hmangin Sporting Goa-in mualneitu Aizawl FC 2-0 in an hneh.

Goan club hian Odafa chhawr thei lo mah se chak thei turin player an nei ṭha a, midfield khaikhawm turin India international midfielder Rowlin Borges an kawl a, a kawppui chu Trinidadian midfielder Densil Theobald a ni. Inkhelh hmasak ṭuma inhliam vanga inlan thei lo Syrian midfielder Mahmoud Al Amna an chhawr theih tawh dawn avangin Aizawl FC tan Goa khaw luma point khat hmuh hi result ṭha a ni ang.

Champion tum Bengaluru

Zanin dar 7:05 hian Pune-ah DSK Shivajians-in 2014 champion Bengaluru an mikhual dawn a, Blues tan champion beiseina tinung zel turin point thum a pawimawh a, inkhel hi Ten Action-ah pekchhuah a ni ang.

Bengaluru hian an mual Sree Kanteerava Stadium-ah kartawp khan Daniel Lalhlimpuia goal hmangin tun hmaa an la hneh ngai loh Mumbai FC an hneh. An match hnuhnung berah hian Lalchhuanmawia Fanai chuan Blues tan inkhel bul a ṭan a, chakna goal khungtu Daniel leh Malsawmzuala te bench aṭangin an tlan lut bawk.

Blues khingpui tur DSK hian Salgaocar lakah point khat an hlawh chhuak a, Mizo defender pahnih Zohmingliana Ralte leh Sena Ralte te minute 90 chhung an inlan.

Tute nge zin?

Aizawl FC-in Shillong Lajong an hneh loh zawhah Goa an pan nghal a, Sporting Goa hmachhawn turin player ngai bawk an zin.

Goalkeepers (2) : Lalawmpuia, Soram Poirei.

Defenders (6) : Lalramchullova, Lalruatthara, Lalchhawnkima, Ricky Lallawmawma, Lalthakima, Emma Chigozie.

Midfielders (8) : Albert Zohmingmawia, David Lalrinmuana, Yuta Kinowaki, Brandon VL Remdika, H. Lalbiakthanga, Lalbiakhlua, Lalramzauva Khiangte, Khwetelhi Thopi.

Forwards (3) : Joel Sunday, Alfred Kemah Jaryan, F. Lalrinpuia.