Rakesh a tel hmel loh - Manager, TKS

Ningani zan dar 8:00 hian Tuikual South leh Mission Veng Vikings ten Mizoram Super League semifinal game 3 an khel dawn a, a chak zawkin Khatla TBL nen final an khel ang.

TKS-in league round-ah 81-77 a Vikings an hneh hnuin semifinal game 1-ah 77-62 in an hneh leh bawk. Amaherawhchu game 2-ah Mission Veng-in feet 6 leh inches 8-a sang Dishant V Shah an chah chho a, Gujarat center hian Vikings chu 89-78 in a chak pui.

Phengphehlep hi game 2-ah Vikings center Dishant lakah an buai tih phat rual a ni lo a, game 3-ah chak ngei tumin Tuikual South-in Hayrana forward Rakesh chah chhoh an tum a, tun thleng chuan an la hlawhtling lo.

Tuikual South mana-ger Lalremsiama Hrahsel chuan, "Rakesh hi kan bia a, min chhanna chu tun dinhmunah chuan ka la remchang lo tih a ni. Semifinal bikah hi chuan a rawn kal aiin kal loh a rinawm zawk a, final kan lut a nih chuan a rawn chhoh ngei a beiseiawm," tiin Vanglaini palai a hrilh.

Rakesh tel loh tur thu hi Tuikual South manager hian 100%-in a confirm ngam lo a, chiang taka a sawi ngam erawh Haryana forward tel lo chung pawhin Vikings an hlau lo tih hi a ni. Remsiama chuan, "Vikings hi league round-ah Dishant-a tel chungin kan hneh tawh a, game 2-a kan hneh loh chhan kha chu kan khelh fuh tawk loh vang a ni. Tunah chuan practice-na hun ṭha kan nei a, kan dang thei em em ang. Final kan thlen ngei ka ring," tiin Dishant-a telna Mission Veng an hlauh loh thu a sawi.

Mission Veng Vikings erawhin Dishant an la chhawr chhunzawm thei dawn a, manager Lal-hruaitluanga chuan, "Keini chu team player-ah kan buai lo. Ṭha takin kan practice thei a, kan chak ngei kan inring," tiin Rakesh tel leh tel loha an buai loh thu Vanglaini palai a hrilh.

Rakesh hi MSL1 Play-off-a dunk hmasa ber a ni a, MSL1-ah vawi thum in-lanin point 37 a nei a, rebounds 33 zet a nei bawk. Haryana forward hi game 3-ah inlan thei se chuan Tuikual South din-hmun a ṭhat phah ngei ang.