Bagan chelhtu Lajong an him tawh?

Nimin tlai khan tlak hlauhawm dinhmuna ding Shillong Lajong chuan Mohun Bagan an mikhual a, Kolkata club hi goal hnih ve ve khunga an inhnehtawkpui avangin Meghalaya club hi season thara I League khel zel turin an dinhmun a ṭha ta hle.

Jawaharlal Nehru Stadium-a inkhelah hian mualneitu Shillong Lajong hlauhawm zawk mah se mikhual team-in goal an khung hmasa zawk a, minute 18-naah Mizo tlangval Jeje Lalpekhlua'n Bagan nomawi beiseina chhi nung turin goal a khung.

Mahse, Lajong an talbuai rei lo. Minute 40-naah Brazilian striker Uilliams Bomfin-a'n free kick aṭangin an si phurh sutna goal mawi takin a khung.

A zawna I League nomawi chawi tum Bagan-in Lajong hneh loh an duh lo a, Yusa Katsumi chuan minute 77-naah Kolkata club hi hma a hruaipui leh.

Lajong tan beisei a bo tawh nia a lan hnuah Meghalaya club tan Uilliams a inlar leh a, kum 27-a upa striker hian injury time-ah goal khat dang khung lehin team pahnih hi 2-2 in an inhnehtawk ta a ni.

Shillong Lajong tan Aizawl FC an hneh ṭuma khel ṭha tak Samuel Lalmuanpuia leh Zodingliana Tochhawng bakah Isaac Vanmalsawma-te'n inkhel bul an ṭan a, Zemabawk North tlangval Samuel-a'n goal khung theihna hun ṭha a neih a chhawr ṭangkai thei lo chu a ui hle ang.