Neymar leh PSG an inhnimhnai

Barcelona forward Neymar-a agent Wagner Ribeiro chuan a player chu Paris St-Germain-in an dawr a nih phawt chuan inbiakna an neihpui tur thu a sawi - Barcelona fan tan chuan chanchin hriat nuam a ni hauh lo ang le.

Neymar-a agent chuan Brazil captain chungchang hi sawiin, "PSG hian Neymar an duh a nih phawt chuan kan titi pui ang. Tunah hian khawvela team ṭha ber tan khelin nuam a ti em em a, hmangaih pawh an hmangaih a ni. Mahse, Paris khawpuia che na PSG ang club ropui tana khelh chu player zawng zawng duhthusam a ni," a ti.

Kum 24-a upa Neymar hian June 2013-a pound maktaduai 48.6-a Barca a zawm hnuin La Liga match 86 khelin goal 52 lai a khung tawh a, Lionel Messi leh Luis Suarez-te nena an inkawp chu eng team tlarhnung tan pawh mangchhia an ni.

Nou Camp-a kum hnih dang contract la nei chunga contract thar la ziak duh lo Neymar chungchang hi a agent chuan sawi chhunzawmin, "Neymar hian Barca-ah kum hnih dang hun a la nei a, enge thleng kan la hria ang chu. A contract tawp nghak thleng zo lo tan pound maktaduai 154-a lei chhuah theih a ni bawk a, PSG tan buaina tham niin a lang lo," tiin PSG chil a ti put thiam hle.